Rauf Mirqədirovla bağlı Avropa məhkəməsinə müraciət olundu

“Rauf Mirqədirovun hüquqlarının pozulması ilə əlaqədar olaraq Avropa Məhkəməsinə şikayət göndərilib”. Bu barədə Modern.az-a jurnalistin vəkili Elmar Süleymanov məlumat verib. O bildirib ki, müraciətdə R. Mirqədirovun valideynləri ilə görüşmək hüququnun məhdudlaşdırılması, qanunsuz olaraq Türkiyədə həbs edilməsi və hələ də Azərbaycanda həbsdə saxlanılması, telefon vasitəsilə əlaqəyə məhdudiyyət qoyulması, Türkiyədə hüquqlarının müdafiə edilməsinə qoyulan qadağa, ittiham üzrə heç bir sübutun təqdim edilməməsi və s. şikayətlər öz əksini tapıb

Qeyd edək ki, “Ayna-Zerkalo” qəzetinin əməkdaşı Rauf Mirqədirov bu il aprelin 19-da Türkiyədə saxlanılaraq Azərbaycana deportasiya edilib. Türkiyədən deportasiya edilərək Bakıya gətirilən jurnalist dövlətə xəyanətdə ittiham olunur. Bu məsələ ilə bağlı hüquq müdafiəçisi Leyla Yunus və onun həyat yoldaşı Arif Yunus da saxlanılıb.