Özümüz gəlməliyik, yoxsa...

Çox nadir hallarda bir evdən həm çox ağıllı, həm də çox avara uşaq çıxır. Əksərində uşaqlar ailələrinə oxşayırlar, avara ailədən elə avara uşaqlar çıxır. İstisnalar mində bir ola bilir. Yəni, ailədə problem varsa, o problem orada yetişən uşağın canına, qanına, xarakterinə hopur. Bu da cəmiyyətin gələcəyinə sirayət edir.
Amma bir məktəb həm avara, həm ağıllı, mədəni uşaqlar yetişdirə bilir. Deməli, hər şeydən öncə təməldir. Uşağın təməli ailədə qoyulur. Bir valideyn kimi övladımın mənfi hərəkətlərinə cavabdehəm. Təbii ki, məktəbin önəmi çoxdur. Məktəb təkcə təhsil müəssisəsi deyil, orada insan tərbiyyə, təlim, mədəniyyət də öyrənməlidir. Bəli, bu ölkənin təhsil sistemində ciddi problemlər var. Məktəblərdə təlim də, tərbiyə də, elə təhsilin özü də aşağı səviyyədədir. Müəllimlərin hamısı o dəyərli ada layiq deyil. Çürüklərin sayı az da deyil. Bunun obyektiv və subyektiv səbəbləri var. Amma elə məsələlər var ki, indiki məktəb sistemi onun qarşısında acizdir.
Təəssüflə qeyd etməliyəm ki, Azərbaycanda ailə institutunun təməli sarsıdılıb. Biz bir xalq olaraq hər zaman ailə dəyərlərimizə görə başqalarından seçilmişik. Amma bizi yıxmaq, öz maraqlarını yeritmək istəyən xarici və daxili qüvvələr bizim ən güclü yerimizi ən zəif yerimiz etməyi bacarıblar. Ailənin müqəddəsliyi anlamı aradan qalxıb. Ailənin dağılması ayıb olmaqdan çıxıb. Nə ailə dəyəri qalıb, nə ailə başçısını obrazı, nə valideyn missiyası, nə də layiqli övlad... Min dəfələrlə təəssüf edirəm ki, ənənəvi ailə dəyərlərini qoruyub saxlaya bilənlər çox az qalıb. Yarımçıq ailələri ayıb olmaqdan çıxaran, hətta onu dəb salan zehniyyətə Allah lənət eləsin.
Ləyaqətli insanları gözümçıxdıya salanlara, kənara itələyənlərə, əxlaqsızı, şəfərsizi önə çəkənlərə, yolunu açanlara min lənət.
Məktəbi, müəllimi hörmətdən, urvatdan salanlara da min lənət.
Son illər baş verən bütün naqisliklərin, biabırçılıqların, abırsızlıqların kökündə ailələlərin və məktəblərin bu durumda olması dayanır.
Vəziyyət çox pisdir, geridönülməzliyin astanasındayıq. Şair deyirdi ki, "Sülhə gəlin, ey insanlar, yoxsa dünya məhv olar". Biz cəmiyyət olaraq sülhə gəlməsək də, ən azından özümüzə gəlməliyik, yoxsa həqiqətən də dünyamız məhv olacaq...
Ya cırlaşıb, dəyərsiz bir topluma çevrilib məhv olmalıyıq, ya da dəyərlərimizə sahib çıxıb, toparlanıb xalq olaraq ayaqda qalmalıyıq.
Zaur Əhməd