Azərbaycanda "dollar ajiotajı": martın sonuna qədər...

Ötən gün Azərbaycan Mərkəzi Bankında növbəti valyuta hərracı keçirilib. Məlumata görə, bankların dollara tələbi 151 milyonu ötüb.

Qeyd edək ki, bu göstərici ötən hərracdan 2.5 dəfə çoxdur. Belə ki, 8 fevralda keçirilən valyuta hərracında banklar 61.4 milyon dollar alış həyata keçirib. Fevral ayında həyata keçirilən 4 hərracda ümumilikdə 370 milyon dollardan çox dollar satılıb.

Dollara tələbin artmasının səbəbi nədir? Dollara tələbatın artmasının nəticəsi nə ola bilər?

Mövzu ilə bağlı iqtisadçı ekspert Natiq Cəfərli Modern.az-a açıqlamasında bildirib ki, cəmiyyətdə dollar ətrafında ajiotaj var: “Dollara olan tələbatın artması ilin əvvəli ilə bağlıdır. İlin əvvəlində müxtəlif büdcə xərcləmələri açılır. Bir çox hallarda xaricdən alınan sifarişlərin həcmi də artır. Həm tikinti, həm də bəzi layihələrin davamı ilə bağlı xərclərin artmasının da təsiri var. Həmçinin dollar ətrafında ajiotaj yaradılıb. Bu ajiotaj cəmiyyətdə getdikcə böyüyür. Devalvasiyanın gözlənildiyi müzakirə olunur. Mənə də gün ərzində bu barədə bir neçə dəfə suallar verilir. Ələqədar qurumlar bu halı idarə etməkdə çətinlik çəkirlər. Bu halın özü də valyutaya olan tələbatın artmasına səbəb olur”.

Ekspert Eyyub Kərimli dollara tələbatın artması bir neçə faktorla bağlı olduğunu deyir:
“Səbəblərdən biri odur ki, ilin əvvəli olduğu üçün ölkəyə idxal olunan məhsulların həcmində artım müşahidə olunur. Bunu statistik rəqəmlər də göstərir. Ötən illə müqayisədə 5 faiz artım var. Digər səbəb isə ilin əvvəlində şirkətlər yeni müqavilələr bağlayırlar. Təchizat üçün xarici şirkətlərlə sazişlər imzalanır. Üçüncü səbəb ötən illə müqayisədə ölkəyə idxal olunan əmtəələrdə müəyyən qiymət artımının olmasıdır”.


Ekspert hesab edir ki, bu hal mart ayına qədər davam edə bilər: "Martın sonundan müəyyən formada bu tələb sabitləşəcək. Çünki qarşıdan Ramazan və digər bayramlar yaxınlaşır. Bu da ölkəyə həm ərzaq, həm də qeyri-ərzaq məhsulların idxal həcmini artırır. Bu da öz növbəsində tələbin artmasına təsir edir”.