Dövlətin ədaləti, ilahi eşq…

İnsan dəyişkən varlıqdır. Çətinə düşəndə, dərdi olanda, başına pis iş gələndə o dəqiqə Allahı yadına salır, ondan kömək istəyir. Allaha inanmayanlar da hansısa tapındığının, uman yeri olanların qapısına qaçır. Amma işləri yaxşı gedəndə, dərdi-tasası olmayanda Allah da, bəndə də yada düşmür.

Biz insanıq Allahın nə etdiyini, nə etmək istədiyini görmürük, dərk etmirik, sadəcə, təsəvvür edirik, düşüncəmizdə öz hislərimizə nəzərən canlandırırıq. Yəni, yaradanın etdiyi və etdikləri bəlli deyil, ya da tam dəqiqliklə aydın deyil.

Bir də var Dövlət və insan, daha doğrusu, Dövlət-vətəndaş münasibətləri.
Dövləti formalaşdıran, ayaqda tutan vətəndaşdır. Vətəndaş işləyir, qazanır, vergi verir, rüsum və başqa formada Dövlətin iqtisadi təməlini yaradır. Məqam gəlir, Dövlət müharibə qərarı verir. Vətəndaşdan qanını, canını qurban verməyi istəyir. Vicdanlı vətəndaş da bu tələbdən boyun qaçırmır, qanını da, canını da fəda etməyə hazır olur, verir də. Vətəndaş hər zaman Dövlətin sərəncamına hazır olur: ya öz xoşuyla, sevgiylə, ya da qanunun gücüylə, tələbiylə. Yəni, Dövlət vətəndaşdan istədiyini hər zaman ala bilir.
Bəs vətəndaş?
Bu gün Dövlətimiz çox böyük, mühüm, illərlə mümkün görünməyəni bacarıb və vacib işləri görür. Ortada olan nəticə hər bir vətəndaşın qürur mənbəyidir. Amma unutmayaq ki, vətəndaş olmasaydı, nə bu dövlət olardı, nə bu qüdrət, nə də bu nəticə... Yəni, hər şeyin səbəbi, mənbəyi vətəndaşdır. Bəli, vətənin daşı ola bilən insanları çox olan dövlət qüdrətli olur.
Azərbaycan vətəndaşı üzərinə düşən bütün vəzifələri layiqincə yerinə yetirir. Qazancından dövlətə pay verir. Məqam yetişəndə balasından pay verdi, can verdi, qan verdi…
Artıq Dövlətin qarşılıq vermək zamanıdır. Mən, Dövlət bildiyim ünvanı sevən, sayğı duyan adamam. Vətəndaş Dövləti baş tacı etməlidir. Bu yaşıma qədər çox haqqıma girilməyinə rəğmən hər zaman kinimi, əsəbimi boğa bilmişəm. Hər zaman Dövlətə BABA deyə müraciət etmişəm, heç də peşman deyiləm.
Bu dünyada qarşılıqsız heç bir şey yoxdur. Yaradan belə insan övladına cənnəti qarşılıqsız vəd etmir. Məncə, vətəndaş bu günə qədər öz üzərinə düşəni edib. İndi Dövlətin babalıq etmək zamanıdır.
Bəli, Dövlət Allah deyil, ondan ilahi ədalət gözləmək əbəsdir. Amma Dövlətin ədalətli olması şərtdir. Çünki Dövlətin ədadlətlə hökm etməsi Allahın təcəllası kimi bir şeydir…
Zaur Əhməd