Toylardakı israfçılıq məsələsi parlamentdə müzakirə oluna bilər

Azərbaycanda uzun illərdir mərasimlər fərqli formada keçirilir. Yas mərasimlərində ölən adama qiymət süfrənin müxtəlif çeşidli təamlarla bəzədilməsindən başlayır. Belə mərasim çal-çağır məclislərini xatırladır. Artıq yas mərasimlərində baş verən israfçılığın qarşısı alınıb, süfrəyə düzülən cürbəcür təamlar yığışdırılıb. Amma toy mərasimlərindəki israfçılığa son qoyulmayıb.

Növbədə toylarda hökm sürən israfçılığın qarşısının alınmasıdır. Bunun üçün hansı addımlar atılmalıdır?
Milli Məclisin Sosial siyasət komitəsinin üzvü İlham MəmmədovModern.az-a deyib ki, yas mərasimlərinin təmtəraqlı keçirilməsinin qarşısının alınması birmənalı olaraq insanların ürəyincədir:

"Təbii ki, yas mərasimləri ilə bağlı müəyyən tədbirlərin görülməsi bəzi işbazların xoşuna gəlməyə bilər. Mən belə bir mexanizmin, ictimai qınağın toy mərasimlərinə də şamil olunmasını istəyirəm. Bunun üçün mətbuatın xüsusi rolu olmalıdır. Bu gün toylarda baş verən israfçılıq yas mərasimlərimizdəkindən dəfələrlə çoxdur. İstər imkanlı, istərsə də imkansız adamların stollarının üstünə eyni tərtib olunmuş menyülər düzülür. 6-7 cür salat, 10 cür soyuq qəlyanaltı, vaxtı keçmiş, müxtəlif bakteriyalar mənbəyi olan qidalar və bu qidalardan zəhərlənmə təhlükəsinin çox olması dəhşətli bir səhnəni ortaya qoyur. Bu, sağlamlığa ciddi zərbə vurmaqla, işbazların ciblərinin dolmasına kömək etməklə yanaşı, toydan sonra xoşbəxtlik əvəzinə, həmin ailələrin borca düşməsinə səbəb olur. Bu adətlər bizim şərti vərdişimizə çevrilməlidir. İctimai qınaq nəticəsində yeni bir forma tapılmalıdır. İnsanlar şüurlu surətdə başa düşməlidirlər ki, bunu edərkən digər birinin qarşısında öz zənginliyini göstərdiyini zənn edirsə, əksinə, cəmiyyətdə daha da pis qarşılanır”.

Deputatın sözlərinə görə, toy mərasimlərdə hökm sürən israfçılığa parlamentin əvvəlki iclaslarının birində toxunulub:

""Mərasimlər haqqında” qanun layihəsini bir müddət əvvəl müzakirə etmişdik. Əslində, bu layihənin qəbul olunmasına ictimai sifariş olmalı idi. Biz bu sifarişi qəbul etdik. Sadəcə, adət-ənənələri qanun çərçivəsinə salmaq bir az çətin ola bilər. Burda bizim, sizin, ziyalı təbəqənin, mətbuatın üzərinə çox böyük məsuliyyət düşür. Təbii ki, Milli Məclisin payız sessiyasında yenidən bu məsələyə qayıda bilərik. Mənə elə gəlir ki, yas mərasimlərində olduğu kimi, toylardakı israfçılığın da qarşısını almaq üçün çıxış yolu tapılacaq”.