Aslan Aslanovun oğlunun adı hallanan avtomobilin sahibi başqası çıxdı

Bu gün mediada yayılan xəbərtə görə, fevralın 20-si gecə saatlarında Şəmkirin sabiq başçısı Aslan Aslanovun oğlu Turqay saxlanılıb. Dövlət Yol Polisi İdarəsi əməkdaşları Nəsimi rayonu ərazisində kobud qayda pozuntusu törədən bahalı "Bentley” markalı maşını saxlayıblar.

Gunpress.az-ın əldə etdiyi məlumata görə, sözügedən avtomobil Allahverdiyev Valeh Ramazan oğluna məxsusdur. Sadəcə olaraq, bəzi saytlar son günlər Aslan Aslanovun gündəmdə olduğunu nəzərə alaraq, belə bir məlumat yayıblar.

Məsələylə bağlı gunpress.az-a açıqlama verən Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov xəbəri təkzib edib. O bildirib ki, Dövlət Yol Polisinin əməkdaşları Turqay Aslanov adlı sürücü ilə bağlı heç bir protokol tərtib etməyiblər: "Dövlət Yol Polisi İdarəsinin adından bununla bağlı bəzi kütləvi informasiya vasitələrində yayılan məlumatların heç biri düzgün deyil. Həmin məlumatlar açıq-aşkar təxribat xarakteri daşıyır və dezinformasiyadır. Bakı Şəhər Dövlət Yol Polisi İdarəsinin əməkdaşları Turqay Aslanova məxsus heç bir avtomobili saxlamayıblar”.