"Pulu heç vaxt özünə yaxın buraxmırdı" - Partiya sədri Elçibəylə bağlı xatirələrini bölüşdü

Bu gün çağdaş Milli Azadlıq Hərəkatının lideri, eks-prezident, AXCP-nin mərhum sədri Əbülfəz Elçibəyin vəfat etdiyi gündür.

Müasir Müsavat Partiyasının sədri Hafiz Hacıyev mərhum prezidentlə bağlı fikirlərini bölüşüb. Partiya sədri GÜNpress.az-a açıqlamasında deyib ki, Əbülfəz Elçibəy Azərbaycan tarixində Azadlıq Hərəkatının banisi kimi qalmış bir şəxsiyyətdir. Onun sözlərinə görə, Elçibəylə birgə işlədiyi dövrdə onun necə insan olduğuna yaxından şahid olub:
"Mən, sovetlər dönəmində yüksək vəzifələrdə çalışmışam. Elçibəylə görüşüb, onunla söhbət edəndən sonra mən həmin sistemə nifrət etməyə başladım. Onunla görüşəndə Kəlbəcərdə komsomol katibi idim. Bəy mənim beynimi milli hislərlə necə dolurdusa, komsomol biletlərini Tərtər çayına tökdürdüm. Bununla əlaqədar Komsomolun Mərkəzi Komitəsində mənim məsələm də müzakirə olund. töhmət də verdilər. Yəni, o elə bir şəxsiyyət idi ki, onunla bir dəfə görüşəndən sonra düşüncən dəyişirdi.
Elə oldu ki, Elçibəy hakimiyyətə gəldi, Prezident seçildi. Onun dövründə nazir vəzifəsinə qədər irəli çəkildim. Onun təmiz insan olduğunun şahidi oldum. Mən nə qədər rəhbər şəxslə işləmişəm, onun qədər təmənnasız adam görmədim. Pulu heç vaxt özünə yaxın buraxmırdı.
O vaxt Amerikaya getmişdik, Azərbaycanın qara kürüsünün təqdimat mərasimini keçirirdik. Hörmətli səfirimiz Hafiz Paşayev də bu məsələdə bizə yaxından kömək etmişdi. Qayıdanda bəyə dedim ki, bəlkə icazə verəsən, kürü ilə bağlı hansısa işlər görək, nəsə qazanaq. O mənə dedi ki, qoy, Şuşanı geri qaytaraq, problemi həll edək, sonra pul qazanarsınız".

Partiya sədri qeyd edib ki, Elçibəy tarixi şəxsiyyətdir və onun ünvanına təhqiramiz ifadələr işlətmək Allahsızlıqdır:

"Təəssüflə qeyd etməliyəm ki, onun komandası sağlığında xəyanət elədi. Bu, heç vaxt mənim yadımdan çıxmaz. İsa Qəmbər Müsavat Partiyasını yaratdı, iki hakimiyyətlik yarandı. Əli Kərimlinin yurdçu komandası Elçibəyin əleyhinə işlədi. Bunlar bizə böyük zərbə vurdu. Bir dəfə gecə 3-də işlə bağlı aparata yanına getmişdim. Orda mənə dedi ki, ətrafımızdakılar anlamırlar ki, biz hansı yolla gedirik və bunların intriqaları bizə zərbə vurur. "Azadlıq" qəzetinin redaksiyası olan olan binada bəyə qarşı tərbiyəsizlik edilirdi. Bir dəfə küsmüşdü getmirdi ora. Deyirdi ki, bu gədələr arxamca danışırla. Əli Kərimlinin sifarişi ilə yazmışdılar ki, guya Elçibəy çox pis xəstəliyə tutulub. Xəstə vaxtı ANS-in jurnalistlərini yönləndirmişdi onun şəkilini çəksinlər.
Bundan əlavə, o vaxt vahid namizəd məsələsi həll olunsaydı, Elçibəy prezident olacaqdı. Həmin dövrdə hamı razılaşdı İsa Qəmbər dedi ki, mən olmalıyam. Bax, beləcə Elçibəyə qarşı xəyanətlər edilirdi. Tarixdən heç bir şey silmək olmaz. Mən həmişə demişəm ki, Rəsulzadə, Elçibəy Heydər Əliyev tarixi şəxsiyyətlərdir. Onların xatirəsi daim əziz tutulmalıdır. Bu gün Elçibəyin anım günüdür, Allah ona rəhmət eləsin. Təəssüf ki, onu zəhərləyib öldürənlər utanmadan onu ziyarətə gedirlər. Əli Kərimlinin xəyanətini ömür boyu bağışlaya bilmərəm.
Sonda bir şeyi deyim ki, Elçibəy mənə sonuncu görüşümüzəd dedi ki, mənə bir şey olsa, Əli ilə İsadan mənim qisasımı al. Mən də bu gün onlardan Elçibəyin qisasını alıram. Sona qədər də onların qarşısında olacağam.
Allah Əbülfəz Elçibəyə rəhmət eləsin".