“Zəfər yolu” layihəsinin təqdimatı olub

Bakı Ali Neft Məktəbində (BANM) “Zəfər” Şəhid Ailələrinə Dəstək İctimai Birliyinin təşkilatçığı və Mənəvi Dəyərlərin Təbliği Fondunun maliyyə dəstəyi ilə Zəfər bayramının 1-ci il dönümünə həsr olunmuş “Zəfər yolu” layihəsinin təqdimatı keçirilib.

GÜNpress.az xəbər verir ki, tədbirdə BANM-in professor, müəllim, tələbə heyəti, Şəhid və qazi ailələri, Ombudsman Səbinə Əliyeva, Dini Qurumlarla İş üzrə Dövlət Komitəsinin sədr müavini Səyavuş Heydərov, millət vəkilləri, KİV və ictimaiyyət nümayəndələri iştirak edib.

Tədbirdə xalqımızın erməni işğalçılarına qarşı mübarizəsindən bəhs edən “Zəfər yolu” filmi də təqdim edilmiş, həmçinin “Vətənim Azərbaycandır!” adlı esse yazı müsabiqəsin qalibləri mükafatlandırılıb.

Tədbir iştirakçılarını salamlayan BANM-nin rektoru Elmar Qasımov bildirdi ki, qələbəmiz Azərbaycan xalqının tarixində şanlı bir səhifə açmış, şəhidlərimizin qanı bahasına qazanılan bu zəfərin gənclərimiz tərəfindən qorunmasının vacibliyi vurğulanıb.

“Zəfər” Şəhid Ailələrinə Dəstək İctimai Birliyinin sədri Sevinc Alızadə Azərbaycanın ərazi bütövlüyü uğrunda şəhid olmuş bütün qəhrəmanların ruhunun şad olduğunu bildirmiş, bu mübarizədə hər bir şəhidin öz rolu və haqqı olduğunu qeyd edib.

Milli Məclisin vitse-spikeri Adil Əliyev qəhrəmanlıqla dolu zəfər tariximizdən bəhs etmiş, gənclərimizi qəhrəmanlardan örnək almağa səslənib.

“Vətən Müharibəsi Qəhrəmanı” XTQ baş giziri Camal İsmayılovun anası Filarə xanım bütün şəhidlərin qəhrəman olduqlarını bildirmiş, onlarla daima qürur duyduğunu qeyd edib.

Tədbir Dövlət Sərhəd Xidmətinin nümunəvi hərbi orkestrinin çıxışı ilə davam edib.