"Bir milləti bədbəxt etməkdən ötrü ilk olaraq onun təhsilini məhv etmək lazımdır" - Partiya sədri

“Mənim də yanıma yüzlərlə valideynlər gələrək deyirlər ki, uşaqlarımız universitetə qəbul olunub, təhsil haqqını verə bilmirik”

Bunu Moderator.az-a açıqlamasında Müasir Müsavat Partiyasının sədri Hafiz Hacıyev son zamanlar günün aktual mövzusuna çevrilən təhsil haqqını ödəyə bilməyən tələbələr haqda danışarkən deyib. H.Hacıyev təhsil haqqıyla bağlı güzəştlərin edilməsinin vacibliyini vurğulayıb:

“Təbii bizim gələcəyimiz təhsildən asılıdır və Azərbaycan təhsili bu gün hansı səviyyədədir onu hamımız görürük. Bir milləti bədbəxt etməkdən ötrü ilk olaraq onun təhsilini məhv etmək lazımdır. Bizim bəzi insanlar da bunu çox ustalıqla yerinə yetirirlər. Amma buna baxmayaraq bizim Birinci vitse-prezident Mehriban xanım Əliyeva təhsil sahəsinə çox böyük diqqət ayırır. Çox təəssüflər olsun ki, təhsil sahəsindəki müəyyən insanlar isə buna dırnağarası baxırlar. Mənim də yanıma yüzlərlə valideynlər gələrək deyirlər ki, uşaqlarımız universitetə qəbul olunub, təhsil haqqını ödəmək imkanında deyilik. Bunların hamısı isə dövlətə qarşı qurulmuş bir tələdir. Bilmirəm bunu görən yoxdurmu?! Mən də deyəndə qınaq obyektinə tuş gəlirəm və mənə təzyiq göstərməyə başlayırlar. Fikirləşirlər ki, bu bir qərəzdir. Əslində isə bu qərəz deyil, özünüz də şahidi olursunuz ki, minlərlə tələbə qəbul olunub, amma təhsil haqqını ödəyə bilmir deyə ortada qalıblar. Belə olanda da həmin tələbələrin valideynləri və özləri gedib əks qüvvələrə qoşulacaqlar.

Biz prezidentini, dövlətini sevən insanlarıq və bu sahədə çalışırıq. Bizə müraciət edən valideynlərə kömək edirik, kiməsə ağız açırıq ki, ölkədə narazılıq yaranmasın. Təhsildəki özbaşınalığın hamısı Azərbaycan dövlətinə qarşı qurulmuş oyunlardır. Özünüz də şahidsiniz ki, ölkə başçısı təhsil haqqında nə qədər sərəncamlar verib, amma gəlin görək bunların on faizi yerinə yetirilirmi? Bunlar çox ciddi məsələlərdir. Ona görə deyirəm ki, hakimiyyət buna çox diqqətli yanaşmalıdır. Müxalifət də bu cür vasitələrdən dövlətə qarşı çox ustalıqla istifadə edir”.