ZƏHMƏTLƏ UCALAN ÖMÜR – HÜSEYN ZƏRBƏLİYEV 60

Peşəyə sədaqətin, zəhmətin və insanlığın 60 illik yolu

Hər ömrün öz yolu, hər yolun isə öz izi var. Elə insanlar var ki, illər onların həyatında sadəcə yaşın üstünə yaş gətirmir – təcrübəyə, nüfuza, hörmətə çevrilir. Geridə qalan illər görülən işlərlə, qazanılan etimadla, yetişdirilən insanlarla, ailədə və cəmiyyətdə qoyulan izlə dəyər qazanır.
Sentyabrın 5-də ömrünün belə bir əlamətdar mərhələsinə çatan insanlardan biri – neftçi-mühəndis, təcrübəli rəhbər Hüseyn Zərbəliyevin 60 yaşı tamam olur.
1966-cı il sentyabrın 5-də Sabirabadda dünyaya gələn Hüseyn Zərbəliyevin böyük neft sənayesinə aparan yolu sadə bir bölgədən başlayıb. Zəhmətə alışmaq, başladığı işi sona çatdırmaq, məsuliyyətdən çəkinməmək kimi keyfiyyətlər onun xarakterində hələ gənc yaşlarından formalaşıb.
1983-cü ildə Azərbaycan Dövlət Neft Akademiyasına – bugünkü Azərbaycan Dövlət Neft və Sənaye Universitetinə daxil olaraq həyatını neft sənayesi ilə bağlayan Hüseyn Zərbəliyev qazma mühəndisi ixtisasına yiyələnib. 1985–1987-ci illərdə hərbi xidmət keçib, daha sonra təhsilini davam etdirərək 1990-cı ildə ali məktəbi başa vurub.
Onun peşəkar həyat yolunun diqqətçəkən cəhətlərindən biri neft sənayesini aşağı pillələrdən başlayaraq öyrənməsidir. Hüseyn müəllim əmək fəaliyyətinə qazmaçı köməkçisi kimi başlayıb. Qazma ustasının köməkçisi, qazma ustası, sahə rəisi olub, istehsalatın bütün çətinliklərini bilavasitə iş başında görüb. SOCAR-ın Qazma İşləri İdarəsində keçən illər ona yalnız zəngin peşə təcrübəsi deyil, həm də sonrakı rəhbərlik fəaliyyətində mühüm rol oynayan bir keyfiyyət qazandırıb – istehsalatı içəridən tanımaq və zəhmətin qiymətini bilmək.
İllər keçdikcə təcrübə artıb, məsuliyyət dairəsi genişlənib. Azərbaycan neft sənayesində gedən yeni proseslər Hüseyn Zərbəliyevin fəaliyyətində də yeni mərhələ açıb. O, beynəlxalq neft-qaz layihələrində çalışaraq yerli istehsalat təcrübəsini müasir idarəetmə yanaşmaları ilə birləşdirib.
“Gobustan Operating Company” və “Bahar Energy Operating Company” məsul vəzifələrdə fəaliyyət göstərib - departament rəisi, əməliyyat meneceri, vitse-prezident və direktor kimi fəaliyyət göstərib. Müxtəlif illərdə üzərinə düşən vəzifələr dəyişsə də, iş prinsipində dəyişməyən bir xüsusiyyət olub – məsuliyyət, tələbkarlıq və nəticəyə yönəlmiş fəaliyyət.
Bu gün həmin zəngin təcrübə Hüseyn Zərbəliyevin fəaliyyətinin yeni mərhələsində davam edir. 2023-cü ildən SOCAR Upstream International Management şirkətində Aktivlərin idarəedilməsi üzrə menecer kimi çalışan Hüseyn müəllim qurudakı PSA layihələrinin idarə olunması, strateji planlaşdırma, istehsalatın səmərəliliyinin artırılması və təhlükəsizlik məsələləri ilə bağlı məsul vəzifələri yerinə yetirir.
Neft sənayesinə həsr olunmuş uzun illərin əməyi diqqətdən kənarda qalmayıb. Peşəkar fəaliyyəti və sahənin inkişafına verdiyi töhfə SOCAR rəhbərliyi tərəfindən yüksək qiymətləndirilərək Hüseyn Zərbəliyev “Fəxri Neftçi” döş nişanı ilə təltif edilib.
Lakin insan ömrünü yalnız tutduğu vəzifələr və qazandığı peşəkar uğurlarla ölçmək olmaz. İnsanın əsl sərvəti onun doğmaları, ailəsi və ətrafında qazandığı sevgidir.
Hüseyn müəllim üçün də ailə həmişə həyatının ən böyük dəyərlərindən biri olub. O, iki qız atası, bu gün isə sevimli nəvəsinin babasıdır. Məsuliyyətli və gərgin iş həyatının yanında doğmaları üçün etibarlı dayaq olmaq, onların sevincini və qayğısını bölüşmək onun üçün hər zaman xüsusi əhəmiyyət daşıyıb. Qayğıkeş ata, mehriban baba, ailəsinə bağlı insan olmaq onun portretini tamamlayan ən qiymətli cizgilərdəndir.
Bu gün 60 ilin zirvəsindən geriyə baxanda uzun və zəngin bir yol görünür: Sabirabaddan başlayan uşaqlıq və gənclik illəri, tələbə auditoriyaları, hərbi xidmət, qazma meydançalarının ağır iş günləri, mühəndislik fəaliyyəti, beynəlxalq layihələr, məsul rəhbər vəzifələri...
Bu yolun hər mərhələsinin öz zəhməti, öz sınaqları və öz uğurları olub.
Ən əsası isə illər dəyişsə də, insanın özünə, peşəsinə və yanında olan insanlara münasibətini müəyyən edən dəyərlər dəyişməyib. Zəhmətkeşlik, sözünə və işinə məsuliyyət, peşəyə sədaqət, dostluqda etibarlılıq və ailəyə bağlılıq Hüseyn Zərbəliyevin 60 illik ömür yolunun əsas xəttini təşkil edir.
Altmış yaş keçmişə yekun vurmaqdan daha çox, zəngin həyat və peşə təcrübəsi ilə yeni bir mərhələyə qədəm qoymaqdır. Qarşıda hələ görüləsi işlər, həyata keçiriləsi planlar, ailə ilə bölüşüləsi gözəl günlər və nəvə ilə yaşanacaq saysız-hesabsız xoş xatirələr var.
Hörmətli Hüseyn Zərbəliyevi 60 illik yubileyi münasibətilə ürəkdən təbrik edir, ona möhkəm cansağlığı, uzun və mənalı ömür, ailə səadəti, doğmalarının sevgisi və peşəkar fəaliyyətində yeni uğurlar arzulayırıq.
Qoy qarşıdakı illər keçilən şərəfli yolun layiqli davamı olsun!

Geologiya-mineralogiya elmləri namizədi Məhyəddin Həsənəliyev