“Müəllimlərin müəllimi”nin yeni kitabı işıq üzü gördü

Tanınmış pedaqoq Xalidə Pirkışiyevanın yeni “Ədəbiyyat” adlı dərs vəsaitinin təqdimatı
keçirilib.
2026–2027-ci tədris ili üçün hazırlanmış vəsait kitabın 1-ci hissəsini əhatə edir. Nəşr
müəllimlər, MİQ imtahanına, ali məktəblərə və olimpiadalara hazırlaşanlar üçün nəzərdə
tutulub.
Xalidə Pirkışiyeva uzun illərdir pedaqoji fəaliyyətlə məşğuldur. O, Bakı Dövlət
Universitetinin dissertantı olub, Sumqayıt Dövlət Universitetində dərs deyib. Hazırda da
məktəbdə dərs deyir və yetişdirdiyi çoxsaylı şagird və tələbələrlə “Müəllimlərin müəllimi”
kimi tanınır.
Pedaqoji fəaliyyətlə yanaşı, Xalidə Pirkışiyevanın elmi yaradıcılığı da diqqət çəkir. Onun
elmi məqalələri Azərbaycanda və xarici ölkələrdə nəşr olunub, müxtəlif qəzet və
jurnallarda yazıları dərc edilib.
Müəllim əməyinə və ictimai fəaliyyətinə görə şəhər rəhbərliyi tərəfindən Tərifnamə və
müxtəlif mükafatlarla təltif olunub.
Yeni “Ədəbiyyat” dərs vəsaitinin təqdimatı müəllimlər və təhsil ictimaiyyəti tərəfindən
maraqla qarşılanıb. Kitabın həm müəllimlərin gündəlik fəaliyyətində, həm də müxtəlif
imtahan və müsabiqələrə hazırlıq prosesində faydalı mənbə olacağı gözlənilir.
Xalidə Pirkışiyevaya yeni nəşr münasibətilə uğurlar arzulayır, pedaqoji və elmi
fəaliyyətində yeni nailiyyətlər diləyirik.