AVH-dan Suriyadakı son durum haqqında bəyanat verib

Azərbaycan Vətəndaş Hərəkatından Suriyadakı son durum haqqında bəyanat verib.

Bəyanatı təqdim edirik: "Son günlər Yaxın Şərqdə vəziyyət daha da gərginləşib. Belə ki, Suriya ərazisində dünya gücləri birbaşa və dolayısı ilə coğrafi, siyasi mövqe savaşındadır. Bu savaş nəticəsində bölgədə humanitar fəlakət baş vermiş, minlərlə mülki şəxs həlak olmuş, milyonlarla insan qaçqına çevrilərək Türkiyəyə sığınmışdır. Artıq bir ilə yaxındır ki, Türkiyə Silahlı Qüvvələri Suriya ilə sərhəddə yerləşən ərazilərdə PYD və YPG (PKK-nın Suriya qanadı) kimi terror təşkilatlarına qarşı ağır döyüşlər aparır. Son günlər Türkiyə Ordusunun uğurlu anti-terror əməliyyatlarını gücləndirməsi Əsəd və onun havadarlarının qəfil əks-hücumu ilə nəticələnmişdir. Hücum zamanı 34 türk hərbçisi şəhid olmuş, nəticədə Yaxın Şərq böhranı daha da kəskinləşmişdir. Hazırda Türkiyə ordusu sərhədlərinin təhlükəsizliyini təmin etmək məqsədilə regionda “Bahar qalxanı” adlanan intensiv anti-terror əməliyyatları həyata keçirməkdədir.
Azərbaycan Respublikasının Prezidenti, Ali baş komandan İlham Əliyev Türkiyə Cümhurriyyətinə başsağlığı vermiş, qardaş ölkəyə xalqımızın mənəvi dəstəyini ifadə etmişdir. Bu, hər iki dövlətin vətəndaşları tərəfindən Türkiyə-Azərbaycan strateji müttəfiqliyinin və dostluğunun təcəssümü kimi qiymətləndirilmişdir.
Münaqişənin dərinləşməməsi, bölgədə yaşanan humanitar fəlakətin qarşısının alınması, o cümlədən qardaş dövlətin sərhədlərinin təhlükəsizliyinin təmin olunması hər iki ölkə vətəndaşlarının mütləq əksəriyyətinin arzusudur. Alimləri, ictimai-siyasi xadimləri, media təmsilçilərini, dövlət və xalq qarşısıda məsuliyyətini dərk edən fəal ziyalıları öz sırlarında birləşdirən Azərbaycan Vətəndaş Hərəkatı da “Bir millət iki dövlət!” prinsipinə, ölkələrimiz arasında strateji müttəfiqlik və dərin tarixi köklərə malik qardaşlıq münasibətlərinə, əsaslanaraq bu mücadilədə Türkiyə dövlətinin və xalqının yanında olduğunu bəyan edir.
Artıq 28 ildir ki, ərazisi işğala, vətəndaşları terrora məruz qalmış, bir milyondan çox qaçqını olan Azərbaycan xalqı qardaş Türkiyənin xarici təhdidlərə və terrora qarşı həssaslığını anlayır və bu səbəbdən Azərbaycan Vətəndaş Hərəkatı tez bir zamanda münaqişənin bitməsini, terrorçu qruplaşmaların zərərsizləşdirilməsini, bölgədə sülh və sabitliyin bərqərar olmasını arzulayır".