“Erməni təxribatı təkrarlansa, dərhal məhv edəcəyik!” - Müdafiə Nazirliyi

Bu ilin avqust ayında Azərbaycan-Ermənistan qoşunlarının təmas xəttində ermənilərin hücumu nəticəsində ordumuz 12 şəhid verdi, bir neçə əsgərimiz isə ağır yaralandı. Son zamanlar cəbhə xəttində nisbi sabitlik olsa da, dünən Ermənistanın hərbi vertolyotunun Azərbaycan sərhədini pozaraq ərazimizə daxil olması ermənilərin növbəti təxribatının davamı kimi qiymətləndirilə bilər.

Ermənistan tərəfi vurulan hərbi vertoyotun separatçı "Dağlıq Qarabağ Respublikası”na məxsus olduğunu iddia etsə də, məhv edilən pilotların Ermənistan Silahlı Qüvvələrində xidmət etdikləri aydın oldu.

Azərbaycan Müdafiə Nazirliyi və Xarici İşlər Nazirliyi dərhal baş verənlərlə bağlı bəyanat yayaraq, vəziyyətə nəzarət olunduğunu bildirdi. XİN Azərbaycanın işğal olunan əraziləri üzərindəki hava məkanının uçuşlar üçün bağlı olduğnu elan etməklə müvafiq qaydada beynəlxalq mülki aviasiya təşkilatının bütün üzvlərini bu barədə məlumatlandırdı.

Növbəti erməni təxribatının qarşısının alınması üçün Azərbaycan Müdafiə Nazirliyi daha hansı addımlar ata bilər?

Nazirliyin İctimaiyyətlə əlaqələr şöbəsinin rəisi, polkovnik Vaqif Dərgahlı Modern.az saytına açıqlamasında bildirib ki, Azərbaycanda hərbi vəziyyət tam nəzarət altındadır:

"Bir daha bəyan edirik ki, sərhədlərimizi pozanlara zərbə endirmək üçün Azərbaycan Hərbi Hava Qüvvələri ən müasir vasitələrə malikdir. Belə hallar bir daha təkrarlanarsa, həmin vasitələr Azərbaycanın Hərbi Aviasiya və Hava Hücumundan Müdafiə Sistemləri tərəfindən dərhal məhv ediləcək”.