Təəssüf, hələlik və görüşənədək, Lerik...

Redaksiyamıza daxil olan oxucu şikayətlərinin təşviqi ilə Lerikə səfərimiz, orada keçirdiyimiz çoxsaylı görüşlər, şəxsi müşahidələrimiz bizi xeyli məyus etdi.

Lerik rayonu – istər rayon mərkəzinin özü, istər kəndlər həqiqətən də problemlər məngənəsindədir. Qeyd elədiyimiz kimi, ilin-günün bu vaxtında, Azərbaycanın Avropanın enerji təhlükəsizliyinə töhfə verdiyi bir dövrdə Lerikin neçə-neçə kəndi qazlaşdırılmayıb və ya qismən qazlaşdırılıb; Lənkəran-Lerik yolunda, eləcə də rayonun müxtəlif kəndlərini Lerik şəhəri ilə birləşdirən asfalt, çınqıl, torpaq yollarda vəziyyət qətiyyən qənaətbəxş deyil və mövcud norma və standartlardan çox-çox uzaqdır (daha ətraflı bu linkdə: http://xeberlent.az/index.php?do=xeber_inner&id=31854 ) . Bundan başqa, Lerik şəhərinin özündə istirahət parkı yox vəziyyətindədir, sakinlər park istəklərini Lənkəran, Astara şəhərlərinə gedib asudə vaxtlarını oradakı parklarda keçirməklə təmin edirlər; Lerikdə ictimai tualet belə yoxdur; keyfiyyətli yanacağı olan YDM isə şəhərdən 50 km uzaqlıqda yerləşir (daha ətraflı bu linkdə: http://xeberlent.az/index.php?do=xeber_inner&id=31874 ) .

Bunlar hələ Lerikdə olan çatışmazlıqların kiçik bir hissəsidir. Araşdırmalarımız – “Regionların Sosial-İqtisadi İnkişafı” dövlət proqramında (2004-2008) əks olunmuş Leriklə bağlı layihələrlə Lerikdə faktiki olaraq fəaliyyət göstərən infrastrukturların vəziyyətinin müqayisəsi çoxlu uyğunsuzluqlar aşkara çıxardı.

Görünür, Lerik kəndlərinin günbəgün boşalması, leriklilərin normal yaşayış arxasınca ölkənin digər bölgələrinə, xüsusən Abşeron regionuna üz tutması, Lerikin bu baxımdan ən acınacaqlı durumda olan rayonların önündə getməsi həmçinin yuxarıda sadaladığımız problemlər səbəbindəndir.

Odur ki, bizim Leriklə bağlı jurnalist araşdırmalarımız hələ davam edəcək. Biz bu yaxınlarda Lerikə daha geniş, bu dəfə foto və video formatında reportajlar hazırlamaq üçün yola düşəcəyik. Ümid etmək istərdik ki, cavabdeh şəxslər və əlaqədar təşkilatlar rayonda olan və bizim də işıqlandırdığımız mənfiliklərin, çatışmazlıqların hamısını olmasa da, əhəmiyyətli bir qismini aradan qaldıracaqlar. Bax onda bizim reportajlar daha nikbin və işıqlı xarakter daşıyacaq – Lerikə və leriklilərə yaraşan xarakter.

Bəhruz Salmanov