Şəhid ailəsinə 11 min manatlıq birdəfəlik ödəmə gecikdirilir - Prezidentə şikayət

Şəhid ailəsi Həqiqət Çərkəz qızı Qurbanova Prezident İlham Əliyevə müraciət edib. Şikayətçi şəhid ailələrinə verilməsi nəzərdə tutulan 11 min manatlıq birdəfəlik ödəməni ala bilmədiklərindən narazıdır.


GÜNpress.az həmin müraciəti təqdim edir:
"Cənab Prezident, əvvəlcə, Şəhid ailələrinə göstərdiyiniz qayğıya görə Sizə bir daha ailəmiz adından təşəkkür edirəm!
21.02.2019-cu il tarixdə Sizə müraciət edərək, Sizin məlum fərmanınızdan sonra biz- Qurbanova Həqiqət Çərkəz qızı, Qurbanova Nuridə Ərzuman qızı və Qurbanova Xəyalə Ərzuman qızı şəhid ailəsi olaraq, zəruri sənədlərimizi hazırlayıb, İmişli rayon natariusuna təqdim etməyimiz və onların da öz növbəsində hazırlanan sənədləri ƏƏSMN-ə göndərməyi barədə məlumat vermişdik.
Qeyd: İmişli rayon natariusu sənədlərimizi 03.01.2019-cu il tarixdə ƏƏSMN-ə göndərib.
Məktubumda, həmçinin, qızımın hamilə olmasını və bu gün-sabah uşaq dünyaya gətirəcəyi, özümün xəstə olmağım, borcumuzun da ki xirtdəkdən olması, borc yiyələrinin də hər gün qapımızı döyməsi haqqında məlumat verərək, pulumuzun tezliklə alınması üçün bizə yardımçı olmanızı xahiş etmişdim...
Sizə hesabat verməyi özümə borc bilirəm ki, xəbərdar olasınız. Məlum edirəm ki, üstündən 5 (beş) ay keçməsinə baxmayaraq, bu günə kimi də bizim müraciətimizə cavab verilməyib.
Qızım dünyaya oğlan uşağı gətirdi. İnşaallah ki, bir az böyüsün vətənimizi qorumaq üçün əsgər gedəcək. Qızımın xəstəxanalıq işlərini sələmə pul götürməklə ödədik. Amma, hələ də borcumuzu qaytara bilməmişik. Borcumuzun üstünə hər gün faiz gəlir. Yəqin ki, alacağımız “qan pulu”nu da borc əvəzinə verərik.
Eybi yox! Biz birtəhər, sürünə-sürünə də olsa, yaşayarıq. Artıq öyrəşmişik ! Təki cənab nazirimiz Sahil Babayev yaxşı yaşasın !