BNA rəsmisi fotoya belə şərh verdi - “Ağlınıza gələni yazırsız”

Bu gün səhər saatlarında ictimai nəqliyyatda sıxlıq yaranması sərnişinlər arasında narazılığa səbəb olub. İnsanlar bu görüntüləri sosial şəbəkələrdə paylaşaraq hazırkı vəziyyətlə bağlı etirazlarını bildiriblər. Vətəndaşlar bu cür sıxlıqda sosial məsafənin saxlanılmasının mümkün olmadığını, bununla da virusdan qorunmağın real olmadığını qeyd ediblər.

Belə fotolardan birini də jurnalist İsmayıl Nəsibli paylaşıb. Bakı Nəqliyyat Agentliyinə qarşı olan ittihamlara qurumun sözçüsü Mais Ağayev elə həmin paylaşıma şərh yazaraq cavab verib.

O bildirib ki, vəziyyətin belə olmasında, avtobuslarda sıxlığın yaranmasında elə sərnişinlərin özləri günahkardır: “Gəlin çıxaq, bir yerdə intervalı gecikdirən onlarla səbəb göstərim sizə. Yazanda bir az obyektiv olun. Çox istərdim digər xarici şəhərlər kimi karantin vaxtı ictimai nəqliyyat tam dayanardı və ya xüsusi icazə ilə olardı. Bax, onda hamı üçün daha yaxşı olardı. Məsələyə dair boş-boş, həqiqətə uyğun olmayan şərh yazanlar, xahiş edirəm, bir qədər obyektiv olun.

Bir neçə gündür avtobuslarda milyondan artıq insan daşınır. Bir milyon sərnişini sosial məsafə gözləməklə daşımaq üçün Bakı şəhərinə 66 mindən artıq avtobus lazımdır. Bakı şəhərinin avtobus parkı “bezrazmer” deyil. Bizdə N sayda deyil, bəlli bir sayda avtobus var.

Martın ortalarında bütün əməkdaşlar istirahətsiz proseslərə cəlb edilib. Bu qədər əziyyət çəkilir. Siz isə görülən işlərə xətt çəkib hər ağlınıza gələni yazırsız. Hamı çöldə, bayırdadır. Bankların, kafe, restoranların qarşısı - hamısı adamla doludur. Gözlənilir sosial məsafə? Siz və digərləri isə ancaq avtobusları hədəf almısız. Bir aydan çoxdur sərnişindaşıma ayaqda tək qalıb. Çox yaxşı olar dayandırılar, siz də rahat olarsız, inanın, biz də”.