Politoloq xəbərdarlıq edir: Neftin qiyməti kəskin ucuzlaşacaq

Dünya bazarlarında neftin qiymətinin sabitləşməsi müşahidə olunur. Hal-hazırda dünya bazarlarında Brent markalı neftin bir bareli təxminən 60 dollara satılır. ABŞ-da da isə WTI markalı neftin qiyməti hal-hazırda bir barel üçün 50 dollar ətrafındadır.

Hazırda neftin qiymətində hiss olunan bu sabitliyin nə qədər davamlı olduğunu öyrənmək üçün politoloq Xəqani Cəfərlin mövqeyini öyrənməyə çalışdıq. “Ötən ilin oktyabrında Sizin sayta açıqlamamda qış fəslində neftin qiymətinin nisbətən sabitləşəcəyini və sonradan yenidən ucuzlaşacağını bildirmişdim. Biz hal-hazırda neft bazarında qiymətlərin stabilliyini müşahidə edirik və təəssüflə qeyd etməliyəm ki, tezliklə bu stabillik sona çatacaq. Təminən iki, ən geci isə üç həftədən sonra qiymətlərin kəskin ucuzlaşması başlayacaq”. Politoloq hesab edir ki, neftin qiymətinin yazın ortalarında 20-30 dollara qədər ucuzlaşmasını gözləmək olar. “Hal-hazırda ABŞ, Avropa və Yaponiyada neft anbarlarında boş yer çox az qalıb. Bu ayın sonunda bütün anbarlar tamamilə dola bilər. Neftin hasilatı artmaqda davam etdiyi halda tələbat azalıb. Bazarlara tələbatdan 1.5 milyon barel artıq neft çıxarılır. Tezliklə tələbat daha da azalacaq. Tələb və təlkif arasında balansın pozulması, eləcə də anbarların dolması qiymətlərin yenidən kəskin ucuzlaşmasına səbəb olacaq. Neft istehsal edən ölkələrdən isə heç biri istehsalı azaltmağa hazır deyil. Çünk, bu halda həmin ölkə bazarı tərk edə bilər ki, yenidən bazara qayıtmaq da çətin olacaq. Bütün bu amillər neftin ucuzlamasını qarşısı alınmaz prosesə çevrib”.