“ParaBokt” vətəndaşın qızıllarını qaytarmır - Borcunu ödəsə də...

Bank olmayan kredit təşkilatı “Parabokt” ilə vətəndaş arasında narazılıq yaranıb. Buna səbəb borcunu ödəyən vətəndaşın “Parabokt”da olan qızıllarının qaytarılmamasıdır.

Belə bir iddia ilə Yaqut Əlyusub qızı Məmmədova çıxış edib.

Y. Məmmədova bildirir ki, “Parabokt” onun şikayətini də araşdırmır.

Y. Məmmədovanın sözlərinə görə, 28 noyabr 2017-ci ildə Sumqayıt şəhərində “Parabokt”dan qızıllarının girov qoyulması müqabilində kredit götürüb. 23 may 2019-cu il tarixində kredit borcunu vaxtından əvvəl bağlayıb. Buna baxmayaraq qızıllarını hələ də geri ala bilmir.

Y. Məmmədovaya qızıllarının geri qaytarılmamasının səbəbi də konkret deyilmir. “Gah deyirlər, inkassator qızılları səhvən aparıb Tovuz filialına verib, gah da bildirirlər ki, sizin qızıllar baş ofisdədir. Deyirəm, baş ofisinizdən qızılımı özüm götürüm, deyirlər, olmaz, sizə verilməyəcək. Nə özləri gətirir, nə də imkan vermirlər özüm götürüm”.

Şikayətçi üzləşdiyi problemlə bağlı “Parabokt”un “Qaynar xətt”inə dəfələrlə zəng vursa da, heç bir məlumat ala bilməyib.

“Əminəm ki, mənim kimi digər vətəndaşların da başına belə oyunlar çox açılıb. Əgər belə halların qarşısı müvafiq orqanlar tərəfindən vaxtında alınmasa, nəticələri çox ağır olacaq",- deyə Y. Məmmədova bildirib.