"...bu Vətənə xain, bu millətə düşməndir" - Qarabağ qazilərindən Elmar Məmmədyarova cavab

Qarabağ qaziləri Azərbaycanın və Ermənistanın xarici işlər nazirlərinin Moskva görüşü ilə bağlı Elmar Məmmədyarovun açıqlamasına etiraz edirlər.

Bu ilin aprelin 15-də Moskva şəhərində Rusiya tərəfinin təşəbbüsünə əsasən, Rusiya xarici işlər naziri Sergey Lavrovun iştirakı ilə Azərbaycan xarici işlər naziri Elmar Məmmədyarov və Ermənistan xarici işlər naziri Zöhrab Mnatsakanyan arasında görüş keçirilib. Görüşdə, həmçinin ATƏT-in Minsk qrupunun həmsədrləri və ATƏT-in fəaliyyətdə olan sədrinin şəxsi nümayəndəsi iştirak ediblər.

Azərbaycanın xarici işlər naziri bununla bağlı jurnalistlərə müsahibəsində görüşün yekun bəyanatında qeyd olunduğu kimi, Azərbaycan və Ermənistan jurnalistlərinin Bakıya, Yerevana və Dağlıq Qarabağa səfərlərinin təşkili məsələsinə toxunub. O deyib:
"Bu, çox maraqlı fikirdir ki, erməni və azərbaycanlı jurnalistlər Yerevana, Bakıya, Dağlıq Qarabağa səfərlər etsinlər. Bundan əlavə, cəbhə bölgəsində kənd təsərrüfatı ilə məşğul olan əhalinin təhlükəsizliyinin təmin olunması barədə razılığa gəldik. Ümid edirəm ki, Ermənistan tərəfi buna hörmətlə yanaşacaq. Sakinlərə öz torpaqlarında işləməyə imkan yaradacaqlar”.

E.Məmmədyarovun bu açıqlaması Qarabağ qaziləri tərəfindən hiddətlə qarşılanıb.
"Vətən Müharibəsi Əlilləri İctimai Birliyinin sədri Firudin Məmmədov bunun təslimçilik siyasətinin bir hissəsi olduğunu bildirib: Bununla Elmar Məmmədyarov və onun kimiləri Azərbaycan xalqını təslimçilik sülhünə hazırlayır. Mən hesab edirəm ki, 20 faiz torpağımızı işğal edərək, başımıza Xocalı və digər müsibətlər gətirmiş bir xalqla hansısa sülhdən danışan, ümumiyyətlə sülh sözünü dilinə gətirən şəxs kimliyindən asılı olmayaraq bu Vətənə xain, bu millətə düşməndir. O şəxslər Azərbaycan xalqının maraqlarından deyil, düşmən mövqeyindən çıxış edirlər. Ona görə də biz bu cür danışıqların hamısını rədd edirik! Rədd olsun xalq diplomatiyası adı altında Azərbaycan xalqını təslimçi sülhə hazırlayanlar! Torpaqlarımızı işğaldan azad etməyi düşünmək əvəzinə "Qarabağı Azərbaycan xalqına necə unutduraq” deyə düşünənlərin dəyirmanına su tökənlərə Allah lənət eləsin. Çünki onlar vətən xainləridir”.