Ruhun şad olsun, Bəhram müəllim, doğma Füzulin artıq azaddır...

“Hər yaxşı musiqi ona görə ürəkdən gəlir ki, yenidən ürəklərdə özünə yuva qura bilsin". Bu fikrin kimə məxsus olduğunu unutsam da, bu yaxşı musiqi haqqında deyilən ən gözlər deyimlərdən biridir, düşünürəm.
Bəli, o musiqilər ürəklərdə yuva qurur ki, o nəğmələr Tanrı tərəfindən ilahi istedadla mükafatlandırılan insanlar vasitəsi ilə doğlulur, qəlblərə yol tapır.

Sentyabr ayının 27-də Füzli şəhərinin işğaldan azad olunduğu günü qeyd edərkən yerli medianı gözüm çox axtardı, lakin onun xatırlandığı və ya onu xatırladan bir yazıya, xəbərə rast gələ bilmədim. Buna baxmayaraq yenə də onun nəğmələri danışırdı...
Sevgilim seyrə çıxaq, burda gəl ilk baharım
Gül açır könlümüzün ən şirin arzuları
Qarabağın 30 illik işğalı dövründə dilimizdən düşməyən, döyüşlərdə belə igid oğullarımızın səsləndirdiyi, dinlərkən gözlərimiz yaşaran, boğazımızda qəhər düyünlənən “Qarabağ” mahnısındandır. Bəlkə də dillər əzbəri olan bu gözəl nəğmənin kim tərəfdindən yazıldığını və bəstələndiyini çoxları bilmir.
Söhbət 1942-ci ilin 22 İyununda Füzuli torpağında dünyaya göz açan, dəyərli bəstəkarımız Bəhram Nəsibovdan gedir. Sovet dövründə onun bəstələdiyi bir –birindən gözəl mahnıları efirdə səsləndirərkən, musiqi təhsili olmadığı üçün müəllif kimi onun adını çəkməyi qadağan etmişdilər. Allahın bəxş etdiyi fitri istedadla ərsəyə gətirdiyi gözəl mahnılar “Xalq mahnısı” adı altında xalqa təqdim edilirdi. O həm də gözəl şair idi. Bu gün dillər əzbəri olan, xalq tərəfindən sevilən “Şahnaz təsnifi” kimi məşhur olan “Deyin hardadır”, “Səni qəmli görəndə”, “Gecələr”, “Qal sənə qurban”, “Gəl inad etmə” və digər mahnılar da Bəhram müəllimin ölməz əsərləridir.
1993-cü ildə Füzuli rayonunun işğalından sonra beyninə qan sızaraq 5 il xəstə yatan şair, bəstəkar Bəhram Nəsibov 1998-ci ildə vətən həsrəti ilə bu dünyadan köçür.
Ruhun şad olsun, Bəhram müəllim, doğma Füzulin artıq azaddır.
Mahnında yazdığın kimi, yenə də könlümüzün ən şirin arzuları gül açır doğma Qarabağımızda.

Həsən Babayev
Berlin, Almaniya