"Azərbaycanın qonşu dövlətlərlə münasibəti inkişaf tempindədir" - Könül İsmayılova

Məlum olduğu kimi, Azərbaycan 2019-2022-ci illərdə Qoşulmama Hərəkatına sədrlik edəcək. Azərbaycanın belə bir nüfuzlu Hərəkata sədrlik etməsi ölkənin nüfuzunun, beynəlxalq aləmdəki imicinin və ona olan hörmətin ifadəsidir.

Məsələ ilə bağlı fikir bildirən Müasir Müsavat Partiyasının ideoloji məsələlər üzrə sədr müavini Könül İsmayılova bizimlə söhbətində bildirdi ki, Azərbaycan multikultural dəyərlərin mövcud olduğu məmləkətdir:

“Bakıdan dünyaya birgə yaşayış mədəniyyəti, sivilizasiya, mədəniyyətlərarası dialoq mədəniyyəti ixrac olunur: Bu da ölkəmizin beynəlxalq aləmdə siyasi çəkisininin daha da artması mənafeyinə xidmət göstərir. Eyni zamanda, Avropa İttifaqı ilə münasibətlərin inkişafı məsələləri diqqət mərkəzində saxlanıldı və cənab Prezident vurğuladı ki, ittifaqın 28 ölkəsinin 9-u ilə tərəfdaşlıq münasibətləri formalaşıb və münasib sənədlər imzalanıb”.

Həmsöhbətimiz onu da əlavə etdi ki, Azərbaycanın xarici ölkələrlə münasibəti göz qabağındadır:

"Azərbaycanın qonşu dövlətlərlə münasibəti inkişaf tempindədir. Təxminən il ərzində 40-a qədər dövlət başçısının Azərbaycana səfəri olub. Bu, həm ikitərəfli formatda, həm də beynəlxalq tədbirlərlə bağlı olub. Bu baxımdan Türkdilli Ölkələrin Əməkdaşlıq Şurasının Bakıda keçirilən toplantısı çox əlamətdar hadisədir və bu təşkilat çərçivəsində Azərbaycanın reytinqi kifayət qədər yüksəkdir.

Azərbaycanın beynəlxalq mövqeyini gücləndirən digər mühüm hadisə paytaxda Qoşulmama Hərəkatına üzv olan dövlətlərin sammitinin keçirilməsidir. Bu qurum tərkib baxımından BMT-dən sonra ikinci ən böyük təşkilatdır. Burada 120 dövlət təmsil olunur, BMT-nin 2/3-i bu qurumdadır”.