Politoloq Xəqani Cəfərli: “Boris Nemtsovun qətlinə görə prezident Putin məsuliyyət daşıyır”

Rusiya müxalifətinin liderlərindən biri, Putin rejiminin sərt tənqidçisi Boris Nemtsovun Moskvada, Kremlin yaxınlığında qətlə yetirilməsi bütün dünyada böyük rezonasa səbəb olub.

Başda ABŞ prezidenti Barak Obama olmaqla Qərb ölkələrinin liderləri bu qətli kəskin pisləyiblər. Nemtsovun qətli ilə bağlı verilən açıqlamalarda Rusiya hökimətindən qısa müddətdə icraçıların və sifarişçilərin aşkar edilərək, həbs olunması tələb olunur. Rusiya müxalifəti, xüsusisən onun mühacirətdə olan hissəsi prezident Putinin hakimiyyəti dövründə qətlin əsl sifarişçilərinin tapılacağına inanmadıqlarını bildirirlər. Politoloq Xəqani Cəfərli də hesab edir ki, həqiqətən Putinin hakimiyyəti dövründə qətlin sifarişçilərinin aşkara çıxarılması və həbsi mümkünsüz görünür. “Qətlin sifarişçisinin Putin olması az ehtimal olunandır. Baxmayaraq ki, mərhum Nemtsov ölümündən əvvəl dəfələrlə Putinin onun ölümünü sifariş verə biləcəyini bəyan etmişdi. Hazırda Rusiyada vəziyyət həddindən artıq həsasdır və belə hadisələr ölkədə böyük hadisələrə gətirib çıxara bilər. Dünyada Putinin imici həddindən artıq pisdir və belə vəziyyətdə o həm də rəqiblərinin qatili kimni görünmək istəməz”. Müxalifət liderinin qətlinin sifarişçisinin prezident Putin olmasını az inandırıcı hesab edən politoloq bununla belə Nemtsovun qətlinə görə məhz Putinin məsuliyyət daşıdığını düşünür. “Bu qətl Putinin Rusiyada yaratdığı yad fikirə qarşı dözümsüz şəraitin nəticəsidir. Bu qətlin arxasında SSRİ-nin dağılmasını faciə hesab edib, bu imperiyanı bərpa etmək istəyənlərin dayanmasına heç bir şübhə ola bilməz. Nemtsov Rusiya müxalifətinin azsaylı nümayəndələrindən idi ki, keçmiş sovet respublikalarının müstəqilliyinə hörmətlə yanaşırdı. Onu imperiyanı bərpa etmək istətən revanşistlərin öldürdüyünə şübhə ola bilməz. Bu mənada Nemtsovun ölümünü Kirovun deyil, Serbiyanın qətlə yetirilən baş naziri Zoran Cinciçin qətli ilə müqayisə etmək daha doğru olar”. Politoloq hesab edir ki, buna görə Nemtsovun ölümü yalnız Rusiyadakı demokratik hərəkata qarşı atılmış güllə kimi deyil, bütün postsovet məkanında azadlıq və hürriyyət mübarizəsinə qarşı açılmış atəş kimi qiymətləndirmək lazımdır.