Politoloq Xəqani Cəfərli: “Putinin deməyə sözü də qalmayıb”

Rusiya prezidenti Vladimir Putinin dekabrın 18-də 3 saat 10 dəqiqə davam edən mətbuat konfransı bütün dünyada geniş müzakirə olunmaqdadır. Putinin artıq ənənə halını almış bu böyük mətbuat konfransı Rusiya prezidentinin dövlət başçısı kimi keçirdiyi 10-cu mətbuat konfransıdır. Bu dəfəki mətbuat konfransına maraq daha böyük idi. Çünki, bu mətbuat konransı ərəfəsində Rusiyanın milli valyutası devalvasiya məruz qalaraq dünyada ən zəif valyuta halına düşmüşdü. Buna görə Rusiya ictimaiyyətinin Putinin bu mətbuat konfransından gözləntisi çox böyük idi. Rusiya prezidentinin bu gözləntiləri doğruldub-doğrultmaması ilə bağlı politoloq Xəqani Cəfərlinin fikirlərini öyrənməyə çalışdıq. Rusiya prezidentinin səsləndirdiyi fikirləri gunpress.az-a şərh edən politoloq Xəqani Cəfərli hesab edir ki, Putin bütün gözləntilərin əksinə heç bir yeni fikir səsləndirmədi. “Rusiya ictimaiyyətinin Putindən gözləntiləri çox böyük olsa da, iki həftə əvvəl Federal Məclisə etdiyi müraciətdə olduğu kimi dekabrın 18-də keçirdiyi mətbuat konfransında da Rusiya prezidenti heç bir yeni fikir səsləndirmədi. Bu isə onu göstərir ki, Putinin deməyə sözü də qalmayıb”. Politoloq hesab edir ki, Putinin üçüncü dəfə prezident kürsüsünə sahiblənməsindən ötən dövr onun heç bir yenilik etməyə qadir olmadığını göstərdiyi kimi, iki həftə əvvəl Federal Məclisə etdiyi müraaciət və dekabrın 18-də mətbuat konfransında səsləndirdiyi fikirlər Putinin Rusiyanın düşdüyü vəziyyətdən necə çıxacağı ilə bağlı aydın fikirinin olmadığını göstərdi. “Putin son bir ildə səsləndirdiyi fikirləri təkrarlamaqda davam edir. Bu fikirlərin əsasını isə cəmiyyəti xarici düşmənlə qorxutma, daxildə düşmən axtarışı və günahı hansısa gizli qüvvələrin üzərinə qoymaq təşkil edir. Putin 15 illik hakimiyyətin sonunda Rusiyanın yenidən defolt təhlükəsi qarşısında qalmasına görə özündə və rəhbərlik etdiyi komandada heç bir günah görmür”. Politoloq hesab edir ki, Putin yalnız siyasi prosesləri nəzarətdə saxlamağa çalışır və iqtisadi sahədə yaşanan fırtınanın siyasi proseslərə təsir etməsinin qarşısını almağa çalışır. “Putin Rusiya iqtisadiyyatında baş verən proseslərin onun nəzarətindən artıq çıxdığını hiss edir. İndi onun yeganə qayəsi iqtisadiyyatda baş verən proseslərin siyasi proseslərə transformasiya olmasının qarşısını almaqdan və hakim elitanın birliyini qoruyub saxlamaqdan ibarətdir. Onun buna nail olması isə mümkün görünmür”. Politoloq Xəqani Cəfərli hesab edir ki, Rusiya böhranın hələ başlanğıcındadır. “Gələn il Rusiyada iqtisadi böhran dərinləşərək, cəmiyyətdə sosial gərginliyi artıracaq. Sosial-iqtisadi böhran isə öz növbəsində siyasi böhran yaradacaq və çox ciddi siyasi proseslərə səbəb olacaq”.