Prodüser Təranə: “Uşağımın atası ərim deyil”

Bir neçə gün öncə prodüser Təranə Səmədova mətbuata övladının nikahdan kənar dünyaya gəldiyi barədə açıqlama verib. Bu tip açıqlamaların cəmiyyətdə birmənalı qarşılanmadığı hər kəsə bəllidir.

Məlumatın yayılmasından sonra prodüserin hansı təpkilərlə üzləşdiyini xəbər almaq üçün özü ilə əlaqə saxladıq.

T.Səmədova isə bütün qınaqları göz önünə alaraq bu addımı atdığını və peşman olmadığını dedi: “Peşman deyiləm. Övladımla xoşbəxtəm. Bu gün ATV kanalında yeni yayımlanan “Düzünü desək” verilişində bu mövzu müzakirə olundu. Mənəvi baxımdan çox güclü insanam. Övladıma görə hər şeyə dözməyə çalışıram”.

Əksəriyyət T.Səmədovanın qızı Suelin atasının prodüserin keçmiş əri müğənni Kərim Abbasov olduğunu düşünür. Amma prodüser xanım bu xəbəri təkzib edir: “Belə düşünən insanlar mənim və ailə həyatım barədə informasiyası olmayanlardır. Fakt odur ki, Kərim uşağımın atası deyil”.

Yeri gəlmişkən, bu günlərdə Türkan Əliyeva da nikahdan kənar övlad dünyaya gətirəcəyini bildirib. Ümumiyyətlə nikahdankənar övlada dünyaya gətirmə halları şou-biznes nümayəndələri arasında geniş yayılıb. Bu, təkcə Azərbaycanda yox, bütün dünyada “dəbdə” olan məsələyə çevrilib. Məsələn, qonşu Türkiyədə tanınmış müğənnilər, aktrisalar nikahdankənar uşaq dünyaya gətirirlər və bunu fəxrlə telekanalların kameralarına söyləyirlər.

Bəs bu cür hallar İslam dinində necə qarşılanır?

Din ekspertlərinin sözlərinə görə, nikahdan kənar, daha doğrusu dini kəbin olmadan qadının uşaq dünyaya gətirməsi haram sayılır və İslami qaydaların hökm sürdüyü ölkələrdə belə hallara rast gəlinərsə, “günahkar bəndələr” şəriət məhkəməsinin araşdırmasından sonra cəzalandırılır.

Təranə Səmədova da İslam dininə etiqad etdiyini deyir. “XXI əsrdə insanların çoxu sözdə Allah deyir, amma təəssüf ki, əməllərində tamam başqa yol tuturlar”.