Dövlət büdcəsindən maliyyələşən kanallar niyə bunu etmir? - Mail Yaqubdan telekanallara haqlı irad

"Təhsil nazirliyinin təşəbbüsü ilə Mədəniyyət Tv-də orta məktəb şagirdlərinə dərs layihəsi həyata keçirilir. Xub, çox yaxşı".

Bu fikirləri fəlsəfə üzrə fəlsəfə doktoru Mail Yaqub irəli sürüb. Amma M.Yaqub deyir ki, onu başqa bir məsələ düşündürür:
"Görəsən bəs bizim Tvlərdə, xüsusilə Mədəniyyət kanalında yuxarı yaşda olan insanlarımıza nə zaman AÇIQ DƏRS verlişləri keçiriləcək? Qatmaqarışıq söhbətlər yoxe, DƏRS. Aydın, konkret, faydalı, aktual. Yoxsa yuxarı yaşda olanların dərsə ehtiyacları yoxdur? Bu qədər aktual ictimai problemlərimiz var. Niyə onlar haqda dərs yoxdu? Özəl televiziyalar pul qazanıb özlərini saxlamaq üçün şou verlişlər verirlər, bunu bildik. Bəs dövlət büdcəsindən maliyyələşən kanallar niyə bunu etmir? Quru, rəsmi, şablon, yorucu, təkrar, qeyri-aktual, faydasız çıxışları demirəm, lap bu kimi çıxışları akademiklər də etsə, onlar dərs hesab olunmur. Cəmiyyətdə hər gün rastlaşdığımız sosial-psixoloji ağrılarımızı dərin, hərtərəfli, aydın, fəsahətlə, tam səmimi və savadlı tərzdə, qlobal və lokal atmosferi dərk edərək danışan müəllimlərin dərslərini heç olmasa, dövlət televiziyaları təşkil etməlidir. Mövzular çoxdur, lap çox".