Daha bir NİDA-çı əfv üçün prezidentə müraciət etdi

3 saylı istintaq təcridxanasında saxlanılan, bloqqer Ömər Məmmədov ölkə Prezidentinə, Mətbuat Şurasına və Vətəndaş Həmrəyliyi Partiyasının rəhbərliyinə müraciət ünvanlayıb. Modern.az Ö. Məmmədovun xahişi və müraciətini olduğu kimi nəzərinizə çatdırır:


“Azərbaycan Respublikasının Prezidenti
cənab İlham Əliyevə

Ədliyyə Nazirliyi Penitensiar Xidmətin
3 saylı istintaq təcridxanasında saxlanılan
təqsirləndirilən şəxs Ömər Elyar oğlu Məmmədov tərəfindən
(maddə 234.4.3, cəza müddəti 5il)

Ərizə

Cənab Prezident hörmətli İlham Heydər oğlu Əliyev!!!
Mən cinayət əməlinə görə həbs edilərək 3 saylı istintaq təcridxanasında saxlanılıram. Həbs olunan günədək ali təhsil alırdım, təhsilimi davam etdirmək, valideynlərimin yaşlı olmasını, özümün gənc olmağımı, gələcəkdə Respublikamızın layiqli vətəndaşı kimi təhsilimi başa çatdırmağımı nəzərə alaraq Sizdən xahiş edirəm ki, məni əfv edəsiniz.
Əvvəlcədən öz adımdan və ailəmin adından Sizə təşəkkür bildirirəm.

08.10.2014-cü il

Məmmədov Ömər Elyar oğlu” “Azərbaycan Respublikasının Mətbuat Şurasına

Surəti: Vətəndaş Həmrəylik Partiyasının sədri Sabir Rüstəmxanlıya

3 saylı istintaq təcridxanasında saxlanılan
təqsirləndirilən şəxs Ömər Elyar oğlu Məmmədov tərəfindən

Müraciət

Yazaraq sizə bildirirəm ki, bu gün mən Respublikamızın Prezidenti cənab İlham Əliyevə əfv olunmağım barədə ərizə ünvanlamışam. Bu ərizəni və yazdığım müraciəti özüm yazmışam və bu, mənim öz fikrimdir. Əlavə olaraq da VHP rəhbərliyindən xahiş edirəm ki, məni üzv olduğum partiyadan bu günkü gündən çıxardasız.
Müraciəti özüm yazdım düzgünlüyünü imzamla təsdiq edirəm.

Ömər Məmmədov Elyar oğlu
08.10.2014-cü il”

Qeyd edək ki, bu ilin iyulun 4-də Bakı Ağır Cinayətlər Məhkəməsinin hökmü ilə blogger Ömər Məmmədov 5 il müddətinə azadlıqdan mərhum edib.