“Bizim məmurların əksəriyyəti sırtılıb, yaltaqlanmaqdan ötəri yüz cildə girirlər”

Ukraynanın yeni seçilmiş prezidenti Vladimir Zelenskinin ötən gün andiçmə mərasimi keçirildi.
Onun çıxışı zamanı ən diqqət çəkən məqam isə məmurların prezidentin portretini başlarının üstündən asmaması ilə bağlı tapşırığı oldu: “Çox istərdim ki, kabinetlərinizdə mənim şəkillərim olmasın. Zəhmət olmasa, olmasın. Çünki prezident ikona və ya idol deyil. Prezident portret deyil. Masanızın üzərinə öz uşaqlarınızın şəkillərini qoyun və hər bir qərardan əvvəl onların gözlərinə baxın”.

Bu barədə fikirlərini GÜNpress.az-la bölüşən Müasir Müsavat Partiyasının sədri Hafiz Hacıyev bildirib ki, Zelenskinin çağırışı müsbətdir, amma Azərbaycan məmurlarına aid deyil:

“Bu cür çağırışlar Azərbaycan məmurlarna qətiyyən təsir eləməz. Artıq bizim məmurların əksəriyyəti sırtılıb. Bunlar yaltaqlanmaqdan ötəri yüz cildə girirlər. Bu adamlar şəkil asmaqla, yalandan cənab, möhtərəm deməklə, öz bildiklərini yeridirlər. Yəni, bunların sevgiləri, hörmətləri sünidir. Bu gün elə bir vəziyyət yaranıb ki, məmurlar yaltaqlıq edirlər, amma bunun fonunda xalqın var-dövlətini talayırlar. Əgər məmurun öz rəhbərinə hörməti varsa, onun şəklini divardan asmağına ehtiyac yoxdur. Öz Prezidentinə hörmət edən məmur onun tapşırıqlarını yerinə yetirər. Ona qarşı xəyanətkarlığa yol verməz. Zelenskinin bu çağırışını da müsbət qiymətləndirirəm. Amma təəssüqflə qeyd etməliyəm ki, Azərbaycan məmurları o keyfiyyətlərdən tamamiylə uzaqdır. Çünki onların bütün hərəkətləri saxtadır. Nə iş görsələr də saxtalıq kimi qəbul edilir. Ümumiyyətlə, ölkədə yalan, yaltaqlıq, saxtakarlıq baş alıb gedir”.


Partiya sədri yaşlı məmurlarla bağlı da fikirlərini bölüşüb. O bildirib ki, hökumətdəki bəzi qoca məmurlar da səhərdən-axşama kimi nəvələrinin şəkillərini əzizləyirlər.
“Yaxşı ki, həmin məmurların bəziləri istefaya göndərildi. Amma nəvələrinin, gəlinlərinin şəkillərini kabinetində asan məmurlar var. Bu adamlar adət-ənənəmizi, milli mənəvi dəyərlərimizi də gözləmirlər. Ona görə deyirəm ki, belə adamlardan sədaqət gözləməyə dəyməz. Zelenskinin təşəbbüsü yaxşıdır, amma ona uyğun məmurlar olmalıdır. Onunla münasibətim olum, görüşmüşəm də. Qalib olandan sonra teleqram vurub, təbrik də etmişəm. Yəqin ki, yaxın zamanlarda Ukrayna səfəri ərəfəsində görüşümüz də mümkün olacaq”.