"...yığsın qohum-əqrəbasını getsin “çerez Yerevan”, Ağdamı gəzsin" - Aqil Abbas

“Moskvada jurnalistlərin gediş-gəlişini təşkil etmək üçün razılaşma əldə olundu. Sağ olsun, Elmar Məmmədyarov nə yaxşı ki, gedib belə bir addım atdı”.

GÜNpress.az xəbər verir ki, bunu millət vəkili Aqil Abbas “Yeni Müsavat”a açıqlamasında deyib. O, bildirib ki, yəqin ABŞ-da da təklif edərlər ki, xalqlar gedib-gəlsinlər: “Deyərlər yığışsınlar ağdamlılar, Aqil Abbas da başda olsun, çünki oralıdır, yığsın qohum-əqrəbasını getsin “çerez Yerevan”, Ağdamı gəzsin. Ağdamda yaşayan ermənilər də yığışıb bəri gəlsin. Ağdamda bir tələbə yoldaşımız var idi, Ararat adında, futbolçu idi, heç ermənicə də bilmirdi. Bir dəfə başqası ilə dava edirdi, qayıtdı ki, sən niyə kişi olasan e, erməniyə oxşayırsan! Özü erməni olsa da, azərbaycanlıya “erməniyə oxşayırsan” deyirdi. İndi də Əsgəranda yaşayır Ararat. Yəqin Ararata deyərlər yığ qohum-qardaşını, get Aqil Abbasgilə!”

A.Abbas əlavə edib ki, ABŞ görüşündən fövqəladə nəticə gözləmir: “Sadəcə, Paris və Moskvadan sonra Vaşinqton deyir ki, “biz də varıq”. Türklərin bir sözü var: “Şorbada bizim də duzumuz olsun”.