Jurnalistin maşını əlindən alındı

“Azadlıq” radiosunun əməkdaşı Yafəz Əkrəmoğlunun avtomobili oktyabrın 4-də saxlanıb və cərimə duracağına aparılıb. Yafəz Əkrəmoğlunun sözlərinə görə, DYP əməkdaşları saxlanma ilə bağlı heç bir rəsmi səbəb göstərməyiblər.

“Oktyabrın 4-də Babək prospektində Bakı Şəhər DYPI-nin əməkdaşları heç bir əsas olmadan avtomobilimi saxladılar. Mənə bildirdilər ki, avtomobilə həbs qoyulub və cərimə duracağına aparılacaq. Tələb etsəm də tutarlı səbəb göstərə bilmədilər. Bunun qanunsuz olduğunu bildirib həbslə bağlı rəsmi sənəd tələb etsəm də, məhəl qoymadılar. Onların məni provokasiyaya çəkmək istədiklərini hiss edib, müqavimət göstərmədim”- deyə jurnalist vurğulayıb.

Yafəz Əkrəmoğlu avtomobilinin qanunsuz saxlanılması səbəbinə aydınlıq gətirilməsi üçün Respublika DYPI-yə müraciət edib. O, məsələni dərindən araşdırmaq üçün vəkil Yalçın Imanovla birlikdə oktyabrın 8-də Respublika DYPI-də olub. Jurnalistin bildirdiyinə görə, müraciətdə ona qarşı qanunsuzluğun aradan qaldırılması xahiş olunur: “Artıq 5 gündür ki, avtomobilim qanunsuz olaraq əlimdən alınıb. Saxlanmanın səbəblərinə də aydınlıq gətirilmir. Avtomobilin harada saxlanması ilə bağlı da mənə sənəd təqdim olunmur. Bu sənəd olmadan məhkəməyə müraciət etmək çətinləşir. Baş verənlər məndə bəzi narahatlıq yaradıb. Ona görə də DYPI rəisinə müraciət ünvanladım ki, bu məsələ araşdırılsın və qanunsuzluq aradan qaldırılsın”.

Vəkil də vtomobilin saxlanmasını qanunsuz sayır. /azadliq.info/