Daha bir sayta haker hücumu

Dünən tənqidi araşdırma xəbərləri yazan "NetXeber.com" İnformasiya Agentliyinə haker hücumu olub. Saytın ana səhifəsinə böyük hərflərlə "AĞILLI OLUN" yazısı yerləşdirilib. Haker qrup özlərini P - 3,14 olaraq adlandırırlar. Bu barədə saytımıza NetXeber-in baş redaktor Azər Bayramov məlumat verib.

Onun sözlərinə görə, saytın bərpası yönümdə saatlarla iş aparıldıqdan sonra qismən də fəaliyyəti bərpa olunub. "Fevralın 16-dan 17-ə keçən gecə saytımız tamamilə dağıdılaraq iflic hala salındı. Bu saytımıza son 2 ayda artıq 3-cü hücum idi. Hakimiyyət daxilində olan holdinqlərlə bağlı aparılan araşdırmalar və bir sıra dövlət məmurları haqqında olan xəbərlərdən sonra bu cür aramsız hücumlar daha da kəskinləşir. Saytda xəbər və foto bazası tamamilə dağıdılmışdı. Bir qismini indi geri bərpa etsək də, fəaliyyətimizə qarşı radikal hücumlar dayandırılmır." Baş Redaktor onu da vurğulayıb ki, "araşdırma və tənqidi yazılarımız davam edəcək. Bir addım da olsa geri addım atmaq kimi fikrimiz yoxdur. Məmurlar özbaşnalıq etməkdənsə, öz işlərində dürüst olsalar daha yaxşı olar. Son günlər digər müxalif saytlara da haker hücumları olur. Əgər qanuna hörmət varsa, aidiyyatı orqanlar lazımi addımlar atmalıdırlar"