“Bu satqınların axrına çıxacağıq” - Hafiz Hacıyev

“Bu gün Azərbaycanda satqın qüvvələr xarici dövlətlərin, kəşfiyyatın əlində oynayır. Ölkəmizə qarşı olan təzyiqlərin başında da, məhz bu satqın qruplar dayanır”. Bunu SİA-ya açıqlaması zamanı Müasir Müsavat Partiyasının sədri Hafiz Hacıyev deyib.

Onun sözlərinə görə, bu qruplar xaricdən aldıqları tapşırıqları can-başla yerinə yetirməyə meyllidirlər: “Eyni zamanda bunlar Azərbaycan hakimiyyətini də təxribata çəkirlər. Bunlar Azərbaycanı insan haqlarının pozulduğu ölkə kimi qələmə verməkdən ötrü Xədicə İsmayıl adlı bar qızını siyasiləşdirdilər. Azərbaycanın bugünki inkişafını Qərbin bəzi dairələrində qəbul etmirlər. Ona görə də Azərbaycan dövlətinə çoxlu sayda şər və böhtanlar yağdırırlar. Bu məqsədlə Azərbaycanla bağlı müxtəlif dinləmələr keçirirlər. Bu gün Azərbaycanda Leyla Yunus və Xədicə İsmayılı həbs ediblər. Onların ən böyük vəkili olan erməni qaynatası Cəmil Həsənli Azərbaycana sanksiyalar tətbiq etməyə çağıran qüvvələrlə aylarla danışıqlar aparır”.

H. Hacıyev deyib ki, bu gün Azərbaycanda dağılmış qurumlar bir-birinə çox həvəslə dəstək verirlər: “Məsələn o Satqınlar Şurasındakı Cəmil Həsənli, Əli Kərimli və Müsavatın başına gətirilən alverçi birlikdə separat danışıqlar aparırlar. Onlar çalışır ki, eyni sözü desinlər və Azərbaycana qarşı sanksiyalar tətbiq olunsun. Bu, çox qorxulu tendensiyadır. Buna görə də Müasir Müsavat Partiyası bununla bağlı çox ciddi addımlar atmaq fikrindədir”.

“Azərbaycanda ciddi inkişafın getdiyi bir ərəfədə mitinq etməyə başlayırlar. Nəyə mitinq edirsiniz? Azərbaycan Prezidentinin fərmanı ilə siyasi məhbus olmayan insanların bir qismi azadlığa buraxıldı. Bir hissəsi də Novruz bayramı ərəfəsində əfv olunacaq. İndi bunlar nə yaman canyanan olublar? Artıq dözə bilmirəm. Bizim partiya bu məsələlərə göz yuma bilmir. Gələn həftə geniş müşavirəmiz olacaq. Ondan sonra biz bu satqınların axrına çıxacağıq. Çünki, bu qədər satqınlıq olmaz”- deyə, H. Hacıyev deyib.