"Lotu Quli"nin vəkili "qorotdel"ə çağırıldı – SƏBƏB

“Lotu Quli” kimi tanınan Nadir Səlifovun vəkili Təranə Əliyeva Bakı şəhər Baş Polis İdarəsinə çağırılıb.

GÜNpress.az Lent.az-a istinadən xəbər verir ki, bu barədə vəkil bildirib ki, dünən səhər saat 10 radələrində Bakı Şəhər Baş Polis İdarəsinə dəvət edilib:

“Dəvət əsasında idarəyə gedəndə bildirdilər ki, barəmdə şikayət ərizəsi daxil olub. Sonra məlum oldu ki, şikayət verən şəxs Qəribə Məmmədovadır. O bir müddət əvvəl Tiflisdə öldürülən Elşən Məmmədovun (Elşən Əmircanski) anasıdır. Şikayət Daxili İşlər Nazirinin birinci müavini Vilayət Eyvazovun adına yazılıb və orada bildirdilər ki, bu iş nazir müavinin nəzarətinə götürülüb”.

Təranə Əliyeva qeyd edib ki, Q.Məmmədova onu mərhum oğlunun ailəsini dağıtmaqda günahlandırıb:

“Qəribə Məmnədova bildirib ki, mərhum oğlu Elşən Məmmədovun ailəsini mən dağıtmışam və həyat yoldaşı ilə 4 azyaşlı uşağını qaçırmışam. Həmçinin şikayətçi deyib ki, guya mən kriminal dəstənin üzvüyəm ".

Vəkil əlavə edib ki, Qəribə Məmmədova şikayətində məsələyə aidiyyatı olmayan məsələri də qeyd edib:

“Mənim Daxili İşlər Nazirliyinin sabiq müavini Telman Əliyevin qızı olmağımdan tutmuş, “Range Rover” avtomobilimin olmasına qədər hər şeyi yazıb. Başa düşmürəm ki, mənim kimin qızı olmağımın bura və yaxud Qəribəyə nə dəxli var? Atam 11 il nazir müavini olub. Mənim babam SSRİ dövründə tanınmış şəxs olub. Mənim “Range Rover”i hardan almağımın Qəribə Məmmədovaya heç bir dəxli yoxdur. Univeristeti qutardığım ilk gündən bəri işləyirəm. 25 ildir vəkil stajım var. Onu da qeyd edim ki, valideynlərim varisiyəm və böyük mirasım var".

Təranə Əliyeva Qəribə Məmmədova ilə tanışlıqlarından da danışıb:

“2005-ci ildən Nadir Səlifovun vəkiliyəm. Vəkili olduqdan sonra onun dostu Elşən adlı şəxslə tanış olmuşam. Elşən öz ailəsi ilə məni tanış edib və hərdən mənə zəng edib Nadir Səlifovdan xəbər alıb. Elşənin uşaqlarının ad günü olanda xahiş edib mənə pul verirdilər ki, onun uşaqlarını gedim təbrik edim. Mən də həmişə anası Qəribə ilə görüşüb, pulu ona verirdim. Axırıncı dəfə Elşən Məmmədov ölən günü Nadir Səlifov 5 min dollar pul verdi ki, onun həyat yoldaşına çatdırım. Evlərinə gedəndə yoldaşı Ülkər və 4 azyaşlı uşaqdan başqa heç kim yox idi. Çünki həmin vaxt Qəribə xanım, Nadir Səlifovun anası ilə birgə Həcc ziyarətində idilər. Daha sonra isə həmin ailə ilə münasibətim olmadı”.

“Lotu Quli”nin vəkili deyib ki, bir müddət sonra Elşən Məmmədovun yoldaşının evlərindən qaçdığını eşidib:

“Məsələ ilə bağlı maraqlandım. Mənə dedilər ki, qızın qızıllarını, sənədlərini əlindən aldığı üçün evdən qaçıb. Hazırda da bu məsələ ilə Suraxanı rayon Məhkəməsində məhkəmə çəkişməsi gedir”.

Təranə Əliyeva son olaraq vurğulayıb ki, barəsində verilən şikayət normal deyil:
"Bu gəlin 13, 15 yaşında deyil ki, onu qaçırım. Mən Elşənin ailəsinə qarışa bilmərəm. İzahatımda da qeyd etdim ki, gəlin ortadadır və ayın 31-də məhkəməsi var. Gedib ondan hər şeyi soruşa bilərsiniz".

Qeyd edək ki, ötən il Tiflisdə qətlə yetirilən kriminal avtoritet Elçin Məmmədovun (Əmircanski) həyat yoldaşı məhkəməyə müraciət edib. Əmircanski “Lotu Quli” kimi tanınan Nadir Səlifovun “sağ əli” hesab olunurdu. Mərhum kriminal avtoritetin həyat yoldaşı Ülkər Rzayeva iddia ərizəsində qeyd edib ki, əri dünyasını dəyişdikdən sonra qaynanası Qəribə Məmmədova ilə münasibətləri pisləşib. Onun sözlərinə görə, bu səbəbdən 4 azyaşlı övladı ilə birgə qaynanasıyla yaşadıqları Əmircan qəsəbəsindəki evlərindən çıxmalı olub. Lakin Qəribə Məmmədova ona məxsus ümumilikdə 77 500 manat dəyərində olan qızılları, sənədləri və digər əşyaları götürməyə qoymayıb.
İddiaçı ərizəsində həmçinin 4 azyaşlı uşaqla birlikdə yaşamaq üçün mənzillərinin olmadığını və Bakı şəhərində kirayə qaldıqlarını da qeyd edib.

Ülkər Rzayeva keçmiş qaynanası Qəribə Məmmədovanı məhkəməyə verərək, özünün və 4 azyaşlı övladının Əmircan qəsəbəsində yerləşən mənzildə istifadə hüquqlarının tanınması, ona məxsus 77 500 manatlıq qızıl-zinət əşyalarının, özünə və övladlarına sənədlərinin, həmçinin geyim əşyalarının qaytarılmasını tələb edir.

İddia ərizəsi Suraxanı rayon Məhkəməsinə təqdim olunaraq baxışa götürülüb. Hakim Səlimə Miriyevanın icraatında olan iş hazırda məhkəmə baxışındadır.

Onu da qeyd edək ki, Elçin Əmircanski 2016-cı ildə Tiflisdə restorandan çıxarkən avtomobildə güllələnib.