Mobil operatorlar milyonlar qazansa da, pandemiya dövründə heç bir güzəşt vermir - ƏSASLI İTTİHAM

"Tələbələrə güzəşt kampaniyasına start verdik, siz də qoşulun ki, onların tədrisi yarımçıq qalmasın. DSK-nın məlumatına görə, bu ilin 1-ci rübündə COVİD-19 pandemiyasının yayılmasının qarşısını almaq məqsədilə həyata keçirilən karantin tədbirlərindən informasiya və rabitə sektoru qazanclarını 18 faizə artırıb".

Bu fikirləri iqtisadçı alim Qubad İbadoğlu səsləndirib. O bildirib ki, 2020-ci ilin yanvar-mart ayları ərzində informasiya və rabitə müəssisələri 546,6 milyon manatlıq xidmət göstərib ki, onun da 71,7 faizi əhali tərəfindən istehlak olunub. Xidmətlərdən əldə edilən gəlirin 40,8 faizi və ya 223,2 milyon manatı mobil telefon rabitəsi sahəsində formalaşıb:
"Deməli, əhali bu ilin 1-ci rübündə rabitə və informasiya xidmətlərini əldə etmək üçün 392 milyon manat xərcləyib ki, onun da 223,2 milyon manatı Azərcellə, Bakcellə və NarMobile ödənilib. Müqayisə üçün qeyd edim ki, bu məbləğ dövlətin COVİD-19 pandemiyasının yayılmasına görə 600 min işsizə ödəyəci 2 aylıq yardım üçün ayrılan məbləğdən cəmisi 4,8 milyon manat azdır. Baxın görün, ölkədə mobil operatorlar 3 ayda nə qədər qazanır və müştərilərinə də hətta pandemiya dövründə heç bir güzəşt vermir. Hətta tələbələrə belə dəstək olmur ki, onlar distant yolla təhsillərini davam etdirsinlər. Əksinə, borc yaranan kimi xidməti dayandırırlar. Xatırladım ki, pandemiya dövründə başqa ölkələrdəki (Türkiyə, Macarıstan, Özbəkistan) mobil operator şirkətləri müştərilərinə anoloji güzəştləri bir aydan çoxdur ki, tədqim edib.
Hesab edirəm ki, Təhsil Nazirliyi tələbələrə mobil internet güzəştinin verilməsi istiqamətində təşəbbüs göstərməli və Nazirlər Kabineti də mobil operatorlara sosial məsuliyyət proqramları çərçivəsində öhdəliklərini xatırladan tövsiyyəsini verməlidir.
Tələbələrə güzəşt kampaniyasına start verək, siz də qoşulun ki, onların tədrisi yarımçıq qalmasın".