Ərdoğan Avropanı hədələdi, terrorçulara vaxt verdi : "Sərhədləri açacağıq..."

Türkiyə Prezidenti Ərdoğan YPG/PYD terror qruplaşmasının 150 saat ərzində ABŞ və Rusiya ilə razılaşdırılmış bölgədən çəkilməsini tələb edib.

O, bu barədə bugünkü çıxışında danışıb. Ərdoğan qeyd edib ki, terror qruplaşması ilə bir masaya oturmaları qətiyyən mümkün deyil: "Bununla bağlı vasitəçilik etmək istəyənləri də əsla qəbul etmirik, etməyəcəyik də. Terror qruplaşması nəzərdə tutulan güvənli bölgədən çəkilməlidir. Əgər 150 saatın tamamında çəkilməzlərsə, o zaman Türkiyə ordusu gərəyini həyata keçirəcək, onları bu bölgədən təmizləyəcəyik".

Ərdoğan çıxışında təhlükəsiz bölgədə inşa olunacaq infrastruktura da toxunub: "Avropa ölkələri bununla bağlı Türkiyəyə dəstək verməlidir ki, suriyalı qaçqınları ora yerləşdirə bilək. Əgər verməzlərsə, o zaman sərhədləri açarıq, köç dalğası Avropaya yönələr".

Xatırladaq ki, bu gün terror qruplaşmasına verilən 150 saatlıq vaxtdan 96 saat ötür.