"Sabitliyi bizlər üçün Azərbaycan polisi təmin edir" - Əsli Kazımova

“Respublikamızda ictimai asayişin, vətəndaşların konstitusion mənafelərinin yüksək səviyyədə qorunmasının, qanunçuluğun və hüquq qaydalarının etibarlı təminatçısı Azərbaycan polisləridir”.
Bunu Azərbaycan Sosial Rifah Partiyasının Birinci müavini Əsli Kazımova polislərin ölkə həyatındakı rolu ilə bağlı danışarkən deyib. Onun sözlərinə görə, ölkənin iqtisadi inkişafı üçün sabitliyin təminatı mühüm amildir: “Həmin sabitliyi isə bizlər üçün Azərbaycan polisi təmin edir. Respublikamızın ictimai-siyasi sabitlik şəraitində inkişafında, ictimai asayişin qorunmasında, cinayətkarlığa qarşı mübarizənin səmərəli təşkilində, dövlətçiliyin hər cür cinayətkar qəsdlərdən müdafiəsində, vətəndaşların təhlükəsiz yaşamaq kimi fundamental hüququnun təminatında Daxili İşlər Nazirliyinin və onun ayrı-ayrı strukturlarının müstəsna rolunun olması danılmaz bir həqiqətdir.

Azərbaycanın daxili işlər orqanları milli müstəqilliyin qazanılması və qorunması, torpaqlarımızın düşmən hücumundan müdafiəsi sahəsində nümayiş etdirdikləri əzmkarlıqla yanaşı, COVİD-19 pandemiyası ilə mübarizə zamanı da göstərdikləri şücaəti unutmaq mümkün deyil.

Düşünün, işğalçı Ermənistanın hərbi təcavüzünə milli müqaviməti ilk olarak məhz polis orqanları təşkil etdiyi kimi COVİD-19 pandemiyası ilə də mübarizədə polislərin ön cəbhədə olması göz qabağındadır. Ona görə də, Azərbaycan polisi dövlətçiliyin sadiq keşikçisi, sabitliyin garantıdır!

Qeyd etmək istəyirəm ki, sadəcə Azərbaycanın ərazi bütövlüyü uğrunda şiddətli döyüşlərdə daxili işlər orqanlarının şəxsi heyətinin 1695 şəhid vermişdir. Canı bahasına ölkədəki sabitliyi təmin etmək naminə şəhid olan bütün polislərə Allahdan rəhmət diləyirəm!