Bakıda şəhid övladları üçün yeni il şənliyi təşkil olunub - FOTO

Nəqliyyat, Rabitə və Yüksək Texnologiyalar Nazirliyi “Zəfər” Şəhid Ailələrinə Dəstək İctimai Birliyi ilə birgə Dünya Azərbaycanlılarının Həmrəyliyi Günü və yeni il ərəfəsində şəhid övladları üçün yeni il şənliyi təşkil edib.

Nəqliyyat, Rabitə və Yüksək Texnologiyalar Nazirliyindən verilən məlumata görə, şənlikdən əvvəl uşaqlar yeni ildə istədikləri hədiyyələr haqqında Şaxta Babaya məktub yazıblar. Şəhid övladlarının öz arzularını qələmə alıb “Şaxta Baba”ya ünvanladıqları məktublar nazirliyin əməkdaşları tərəfindən oxunub və arzuları yerinə yetirilib. Nazirlik kollektivi budəfəki yeni il şənliyini uşaqlar üçün unudulmaz və yaddaqalan günlərdən birinə çevirmək üçün əllərindən gələni etsə də, Şaxta Babaya yazdıqları məktublarda bəzilərinin qələmə aldıqları ürəkləri sızladıb.

Şəhid baş leytenant Nurid Abdullayevin oğlu Ümidin “Şaxta Baba”ya məktubundan: “Bu il və bundan sonrakı bütün yeni illərdə atamızın yanımızda olmasını istəyirik. O gəlsə, həm anam, həm qardaşım, həm nənəm, həm də mən xoşbəxt olaram. Hamımız sevinərik”.

Şəhid mayor Əhməd Abdullayevin oğlu Nihadın qələmə aldığı arzularından: “İllərdir arzuladığım diləyimi yazmaq istəyirəm. Mən 2020-ci ildə ataların sağ qalmasını, bizlərin atasız böyüyən son uşaqlar olmasını diləyirəm. Bu mənim ən böyük arzumdur”.

“Şaxta Baba” onların bəzilərinin arzularını yerinə yetirməkdə aciz qalsa da, hər bir şəhid övladını ayrıca təbrik edib, hədiyyəsi ilə sevindirib.

Qeyd edək ki, “Şaxta Baba” məhz uşaqların yazdıqları məktublarda istədikləri hədiyyələrlə onların görüşünə gəlib. Tədbirdə eyni zamanda körpələr üçün xüsusi müsabiqələr, əyləncəli oyunlar təşkil olunub.

Sonda yolka ətrafında toplaşan uşaqlar “Qar Qız”, “Şaxta Baba” və digər nağıl qəhrəmanları ilə birgə əylənib.