AzMİU-da 31 mart qurbanlarının xatirəsi anılıb

Bu gün Azərbaycan Memarlıq və İnşaat Universitetinin (AzMİU) Su təsərrüfatı və mühəndis kommunikasiya sistemləri fakültəsinin təşkilatçılığı ilə 31 Mart - Azərbaycanlıların Soyqırımı Gününə həsr olunmuş anım tədbiri keçirilib. 

GÜNpress.az xəbər verir ki, tədbirdə AzMİU-nun rektorluğu, professor-müəllimlər heyəti və tələbələr iştirak ediblər.

Tədbiri universitetin Tədris işləri üzrə prorektoru Akif Qasımov açaraq qeyd edib ki, 1918-ci ilin mart-aprel aylarında Azərbaycan xalqının başına gətirilmiş ən dəhşətli faciələrdən biri də Bakı Sovetinin mandatı altında fəaliyyət göstərən daşnak-bolşevik silahlı dəstələri tərəfindən xüsusi qəddarlıqla törədilmiş kütləvi qırğınlardır. Prorektor vurğulayıb ki, ulu öndər Heydər Əliyevin 1998-ci il martın 26-da imzaladığı "Azərbaycanlıların soyqırımı haqqında” fərmanında ilk dəfə olaraq bu hadisələrə siyasi və hüquqi qiymət verilib və azərbaycanlıların ermənilər tərəfindən soyqırımına məruz qalması faktları bütün dünyaya bəyan edilib.

İctimai fənlər kafedrasının dosenti Gülarə Abbasova qeyd edib ki, erməni bolşeviklərinin soyqırımı siyasəti nəticəsində erməni silahlı dəstələri təkcə Bakıda deyil, Şamaxıda, Qubada, Xaçmazda, Lənkəranda, Hacıqabulda, Salyanda, Qarabağda, Naxçıvanda, digər şəhər və kəndlərdə on minlərlə azərbaycanlını xüsusi amansızlıq və işgəncələrlə qətlə yetiriblər. 

Su təsərrüfatı və mühəndis kommunikasiya sistemləri fakültəsinin dekan müavini Mənsur Zərbəliyev çıxışında soyqırımı ilə bağlı ötən illərdə çoxlu sayda yeni faktlar və sənədlərin toplandığını, Quba şəhərində kütləvi məzarlığın aşkar olunduğunu tələbələrin diqqətinə çatdırıb.