Əli Abbasovun sinif yoldaşı olan rektorla bağlı şok iddia

Azərbaycan Texnologiya Universitetinin rektoru ilə bağlı ilginc məlumat yayılıb.

Arqument.Az-a daxil olan məlumatda bildirilir ki, universitetin rektoru Akif Süleymanov ali məktəbi şəxsi mülkiyyəti kimi idarə edir. Məlumatda həmçinin vurğulanır ki, rektor təhsil naziri Mikayıl Cabbarova və rabitə və yüksək texnologiyalar naziri Əli Abbasova yaxın şəxs olduğunu da gizlətmir: "İclaslarda açıq şəkildə bildirir ki, heç kim mənə bata bilməz, çünki oğlum təhsil naziri Mikayıl Cabbarova maşın bağışlayıb, özüm də rabitə və yüksək texnologiyalar naziri Əli Abbasovun sinif yoldaşıyam. Hazırda Texnologiya Universitetində rektor dekanlara "tas" qoyub, imtahanlarda 3 almaq istəyən tələbə 50 manat, 4 almaq istəyən 70 manat, 5 almaq istəyən 100 manat verməlidir".

Yazıda qeyd olunur ki, 2013-cü ilin mart ayında rektor təyin olunan Akif Süleymanov bir neçə gündən sonra köhnə "Hunday Sonata" maşınını prorektora ötürərək özünə 40 min manatlıq 20-AA-520 dövlət nömrə nişanlı "Lexus ES" markalı avtomobil alıb:

"Diqqətinizə çatdırım ki, Akif Süleymanovun oğlu maşın alverçisidir. Özü bir neçə dəfə iclaslarda bildirib ki, mənim oğlum maşın alveri ilə məşğul olur. O deyir ki, təhsil naziri Mikayıl Cabbarov “İçərişəhər” Dövlət Tarix-Memarlıq Qoruğunun direktoru vəzifəsində işləyərkən oğlum ona maşın hədiyyə edib. Akif Süleymanov açıq deyir ki, Əli Abbasov sinif yoldaşım, Mikayıl Cabbarov da oğlumun dostudur".

Məlumatda iddia olunur ki, Akif Süleymanovu müdafiə edənlərdən biri də təhsil nazirinin müşaviri İlham Pirməmmədovdur. Məhz onun himayəsi və dəstəyi hesabına o, universitetdə belə bir vəziyyət yaradıb: "Akif Süleymanov Qazax rayonundandır. Təhsil nazirinin müşaviri və Sülemanovun himayəçisi İlham Pirməmmədov onun həmkəndlisidir. Ona görə də Pirməmmədov Akif Süleymanovu müdafiə edir. Onu da deyim ki, Akif Süleymanov özü də maşın alveri ilə məşğul olur. Bir neçə gün bundan əvvəl 60 min manata "Hunday" markalı avtobust alıb. Açıq görünür ki, bu adam universitetin büdcəsini talayır".


Bildirilir ki, Süleymanov universitetin 50 nəfərdən çox işçini işdən azad edib. Onların yerinə isə özünə yaxşın şəxsləri "ştat"a götürüb: "Bundan başqa, 2014-cü ilin sentyabr ayında 4 dekan müavinini bir gündə işdən azad edib və bir gündə də onların yerinə yeni dekan müavinləri götürüb. Hətta həmin dekan müavinlərindən biri - Namazov Qəhrəman universitetin bütün "qara işləri"ni həyata keçirir və rektora yaxın şəxsdir. Akif Süleymanov rektor təyin olunandan bu günə kimi götürülən işcilərin siyahısını kadrlar şöbəsindən tələb etsəniz, təsdiqini tapacaqdır ki, işə götürülən şəxslər, ixtisara salınan işçilərdən fərqlənir. Çünki rektor yeni işçiləri öz zövqünə uyğun işə götürür. Bu işçilərin bir çoxu təsərrüfat işləri üzrə prorektor Aslan Quliyevin otağında oturur, ona katribəlik edirlər. Soruşan lazımdır ki, Akif Süleymanov nə üçün Firuzə Qarayevanı, Mətanəti qəbul şöbəsinə işə götürüb?! Əslində, Texnologiya Universitetinin rektoru Akif Süleymanov Mikayıl Cabbarovun onun oğlunun dostu, Əli Abbasovun özünün dostu olmağını bildirməklə göstərmək istəyir ki, kifayət qədər arxalı adamdır".

Yazıda adıkeçən şəxslərin də mövqeyini dərc etməyə hazırıq.