Hafiz Hacıyev: “Cəmil Həsənlinin planının arxasında məkrli siyasət dayanır”

"Bu gün "Milli Şura”nın sədri Cəmil Həsənli və digərləri Azərbaycanı xarici kəşfiyyata satan insanlara yaşıl işıq yandırırlar. Yəni, onların mütəmadi olaraq xaricə sərbəst gedib-gəlmələri, davranışları bunu deməyə əsas verir”. Bunu SİA-ya Müasir Müsavat Partiyasının (MMP) sədri Hafiz Hacıyev "Milli Şura”nın sədri Cəmil Həsənlinin Leyla Yunusun qaynı ilə birgə ABŞ Konqresmenlərinin senatı ilə görüşməsinə və onlardan dəstək almasına münasibət bildirərkən deyib.

Partiya sədrinin sözlərinə görə, onlara sanki Azərbaycan haqqında reallığa uyğun olmayan bütün məsələləri erməni, xarici kəşfiyyatdan tutmuş bizi istəməyən dövlətlərin bütün agentüra şəbəkələrinə kimi ötürməyə müstəsna səlahiyyət veriblər: "Ümumiyyətlə bu, qeyri-mümkün məsələdir. Ölkəmizin xaricdə eməni havadarlarına və bizləri istəməyən qüvvələrə satılması yolverilməz haldır. Düşünürəm ki, bu insanlar ictimai qınağa tuş gəlməlidirlər. Mən dəfələrlə demişəm ki, Cəmil Həsənli ermənilərlə əlaqəli şəxsdir. Çünki, onun kürəkəni ermənidir. İşğalçı ölkənin də istəyi ölkəmizdə qarışıqlıq yaratmaq, Azərbaycanın işğal olunmuş torpaqlarını xalqımıza unutdurmaq və öz hakimiyyətlərinə münasib bir adam gətirməkdir. Məqsəd isə Dağlıq Qarabağı hakimiyyətə gələcək şəxsə verməkdir. Qəmbərov İsa, Kərimov Əli, Həsənov Cəmil bu yolda çox ciddi addımlar atırlar.

Həsənov Cəmilin ABŞ Konqresmenlərinin senatında və digər yerlərdə Leyla Yunusun, Xədicə İsmayılovanın məsələsini müzakirə edib və Azərbaycana qarşı sanksiyalar tətbiq edilməsini tələb etməsi bu, ölkə xalqına bir nömrəli xəyanət və düşmənçilikdir. Bu cür adamları ifşa etmək lazımdır. Düşünürəm ki, Həsənov Cəmilin bu planının arxasında çox məkrli bir siyasət dayanır. Düşünürəm ki, bu, Azərbaycanı istəməyən və xarici satılmış qüvvələrin birgə işinin nəticəsidir. Məsələn, Qəmbərov İsa böyük sevinclə deyir ki, sanksiyalar tətbiq olunacaq. Niyə? Nəyə görə? Bəyəm, onlar Azərbaycanı xarici kəşfiyyatlara satdıqlarına görə ölkəmizə qarşı sanksiyalar tətbiq olunmalıdır? Təbii ki, bu, yolverilməz haldır”.