Mikayıl Cabbarov imtahanlarla bağlı ali məktəb rektorlarına tapşırıq verdi

Təhsil naziri Mikayıl Cabbarov ali təhsil müəssisələrində 2014/2015-ci tədris ilinin payız semestrinin imtahan sessiyasını mövcud qaydalara uyğun təşkil etmək, tələbələrin biliyinin qiymətləndirilməsində şəffaflığı və obyektivliyi təmin etmək məqsədilə müvafiq əmr imzalayıb.
Təhsil Nazirliyindən Modern.az saytına verilən məlumata görə, nazirin əmri ali təhsil müəssisələrinin rəhbərləri ünvanlanıb.

Belə ki, rektorlardan tələb olunur ki, imtahan sessiyası mövcud normativ sənədlər əsasında təşkil olunmalı, ali təhsil müəssisələrində imtahan qərargahı yaratmalı və qərargaha daxil olan hər bir şikayətin qısa müddətdə operativ şəkildə araşdırılmasını təmin etməlidirlər.

Nazirin əmrinə əsaən, imtahan sessiyasında şəffaflığı təmin etmək üçün imtahanlarda ictimaiyyətin və valideynlərin iştirakına şərait yaradılmalı, imtahanların təşkilində və gedişində nöqsanlara, neqativ hallara yol vermiş şəxslər barədə mövcud qanunvericiliyə uyğun tədbirlər görülməlidir. Rektorlar rəhbərlik etdikləri ali təhsil müəssisəsində baş verə biləcək hər bir neqativ hala görə məsuliyyət daşıyacaqlar.

İmtahan sessiyasının təşkili, keçirilməsi və nəticələri barədə sessiya bitdikdən sonra 10 gün müddətinə Təhsil Nazirliyinə yekun hesabat veriləcək

Əmrə əsasən, 2015-ci ildə Bakı şəhərində I Avropa Oyunlarının keçirilməsi ilə əlaqədar Bakı şəhərində yerləşən ali təhsil müəssisələrində payız semestrinin imtahan sessiyası 29 dekabr 2014-cü ildə başlayıb və 18 yanvar 2015-ci il tarixində sona çatacaq.

Nazir əmrin icrasına nəzarəti öz üzərimə götürüb.