“LUXE HOME” 12 nəfərdən ibarət ailənin evini “başına uçurur” – VİDEO

“Bakı şəhəri Nərimanov rayonu “LUXE HOME” Tikinti şirkəti 12 nəfərdən ibarət ailənin yaşadığı mənzili bilərəkdən qəzalı vəziyyətə salır”.

Bu barədə Unikal.org-a Nərimanov rayonu Mayakovski 7, mənzil 3 ünvanında yaşayan Səbirə Hacıyeva bildirib.O vurğulayıb ki, şirkət tərəfindən onlara məxsus mənzilin qəzalı vəziyyətə salınmasının səbəbi “LUXE HOME” rəhbərliyinin qoyduğu kompensasiya şərtlərinə razılıq verməyimizə məcbur edilməyimizdir.“Biz 12 nəfər ailə üzvümüzlə mülkiyyətimizdə olan mənzildə yaşayırıq.

“Luxe Home” MTK tikinti şirkəti mənzilimizin divarları arxasında bir sotdan da az ərazidə Şəhərsalma və Tikinti qaydalarının tələblərini ciddi şəkildə pozaraq, yaşayış mənzilləri ilə tikinti arasında ara məsafəsi gözləmədən tikinti-söküntü işləri aparır.Şirkət rəhbərliyinin tapşırığı ilə fəhlələr mənzilimizin divarlarını qərəzli şəkildə dağıdaraq, qəzalı vəziyyətə saldılar. Divarlarda bir tərəfli çatlar əmələ gəlib. Yağış mənzilimizə tökülür və evimizin bir otağının divarları artıq çökmək üzrədir. Hazırda mənzilimizə gələn qaz xəttini də kəsiblər. İctimai yola olan gediş-gəlişimizi birtərəfli bağlayıblar. Hazırda əraziyə eni 11 metr, uzunu 18 metr olan ağır texnika salıblar”.

Səbirə Hacıyeva iddia edib ki, müvafiq qurumlara və o cümlədən Fövqəladə Hallar Nazirliyinə (FHN) məsələ ilə bağlı müraciət etmələrinə baxmayaraq şikayətlərinə baxan yoxdur: “Bütün idarə və təşkilatlara müraciət etmişik.Onlar da gəlib, şirkətin ofisinə girib sonra da çıxıb gedirlər. Bizim tərəfə isə gələn yoxdur. Bir sözlə həyatımız və sağlamlığımız təhlükə altındadır”.