Rəşad Atakişiyev təyyarənin xilası üçün sonacan mübarizə aparıb - Hərbi təhlilçi

“Pilotun katapult anını gecikdirməsi ehtimalını ilk gündən irəli sürmüşdüm. Təcrübəli pilot üçün təyarəni xilas etmək şərəf məsələsidir. Döyüş maşını uğrunda sonacan mübarizə aparmış şərəfli zabit Rəşad Atakişiyevə Allahdan rəhmət diləyirəm”.

GÜNpress.az-ın məlumatına görə, bu fikirləri hərbi icmalçı, ehtiyatda olan polkovnik-leytenant Nazim Bayram deyib.

Qəzanın səbəbinə gəlincə, N.Bayramın sözlərinə görə, Müdafiə Nazirliyində yaradılan “Aviasiya hadisəsinin araşdırılması komissiyası”nın rəyini şübhə altına almaq üçün əsası yoxdur:

“Quşlarla təyyarələrin toqquşması hadisələri nadir hal deyil. Hər il dünyada quşlarla təyyarələrin toqquşması ilə bağlı 5 mindən çox hadisə qeydə alınır və müxtəlif dərəcəli qəzalar baş verir. Uzağa getməyək, bir neçə gün əvvəl quşların mühərrikə düşməsindən "Ural Avialiniyaları" kampaniyasının təyyarəsi qəza halında qarğıdalı sahəsinə eniş etdi. Bəzən isə quşlar pilot kabinasına çırpılırlar. Baxmayaraq ki, quş adi halda kiçik və yumşaq cismdir, təyyarənin yüksək sürətinə görə bəzən pilotlara ciddi xəsarətlər yetirir. Keçən il analoji hadisə İsveçrə hərbi təyyarəsi ilə baş vermişdi. Pilot xəsarət alsa da, katapult edə bilmişdi”.

Bununla yanaşı, hərbi təhlilçi deyir ki, Müdafiə Nazirliyinin komissiyasının rəyini şübhə altına almaq hər kəsin haqqıdır.

“Bunu kim nə niyətlə şübhə altına alırsa, özü bilər. Ancaq ümumən yüksək sürətlə hərəkət edən təyyarəyə quşun çırpılmasına və bunun nəticəsində pilotun xəsarət ala bilməsinə sosial şəbəkələrdə lağ-lağı etmək sadəcə avamlıq və avarıçılıq deyil, aqressiv nadanlıqdır. Bunu etməsinlər”.