Qalmaqallı direktor Sevinc Abbasovanın daha bir qanunsuz əməli üzə çıxdı

162 saylı orta məktəbib direktoru Sevinc Abbasovanın daha bir qanunsuz əməli barədə məlumat daxil olub.

Övladları həmin məktəbdə təhsil alan valideynlərin AFN-ə verdiyi xəbərə görə, S.Abbasova məktəbdə qanunsuz məktəbəqədər hazırlıq təşkil edibmiş:
"Ötən il yeni tədris ili başlamamışdan əvvəl bizə deyildi ki, məktəbdə hazırlıq təşkil ediləcək, bunun üçün iki sinif və iki müəllimə ayrılacaq. Biz də rəhbərliyə müraciət edib uşaqlarımızı yazdırdıq, hər uşaq üçün ayda 5-10 manat "otaq pulu" alırdılar. İndi Sevinc Abbasova məlum hadisələrlə əlaqədar işdən çıxarılandan sonra onu əvəz edən şəxs hazırlıq qruplarının fəaliyyətini dayandırdı. Bunu uşaqlarımıza qarşı haqsızlıq hesab edirik. Qanunsuz da olsa, dərs ilinin bitməsinə az qalmış müddətdə belə bir addımın atılması körpələrdə məktəbə, təhsilə qarşı mənfi fikir formalaşdıra bilər. Direktor əvəzi bizə deyir ki, onsuz da hazırlıq lazımsız bir şeydir. Lazımsızdırsa dövlətin vəsaiti niyə havaya sovrulur?".

Qeyd edək ki, 2018-2019-cu illərdə Bakı şəhəri üzrə hazırlıq qruplarının təşkil ediləcəyi orta məktəblərin siyahısında 162 saylı məktəbin adı yoxdur. Məsələ ilə bağlı Bakı Şəhər Baş Təhsil İdarəsinin elektron ünvanına soğru ünvanlasaq da, redaksiyamıza cavab təqdim edilmədi.