Azərbaycanın Moskva səfirliyində yanğın xəbəri yayıldı - Səfirdən açıqlama

Rusiya Fövqəladə Hallar Nazirliyinə Azərbaycanın Moskvadakı səfirliyində yanğın çıxması ilə bağlı məlumat daxil olub.

GÜNpress.az xəbər verir ki, bu barədə “TASS” agentliyi nazirlikdəki mənbəsinə istinadən məlumat yayıb.

Hazırda FHN əməkdaşları informasiyanın doğruluğunu yoxlayırlar. Hadisə yerinə bir neçə yanğınsöndürmə maşını cəlb edilib.

Azərbaycanın Rusiyadakı səfiri Polad Bülbüloğlu isə virtualaz.org-a bildirib ki, Rusiya KİV-lərinin diplomatik korpusun binasında yanğınla bağlı yaydıqları xəbər dezinformasiyadır.

“Hazırda biz səfirlikdəyik və burada Heydər Əliyev Fondunun Rusiyadakı nümayəndəliyinin dəstəyi ilə dərc edilmiş “Mədəniyyətlərin dialoqu və müasir dövrün çağırışları” kitabının təqdimat mərasimi keçirilir. Tədbir çərçivəsində həmçinin Azərbaycan xalqının ümummilli lideri Heydər Əliyevin anadan olmasının 96-cı ildönümü qeyd olunur”, - P.Bülbüloğlu deyib.