Şəhidi haqq etməyənlər...

Şəhid ailəsinin acısını, ağrısını içində hiss etməyənlər onların evinə girməsin...

Saxta yolla mandat alanlar, yaltaqlıqla vəzifəyə gedənlər, xalqın malını talayanlar, öz balasını gizlədib başqasının övladını önə verənlər nə bilir, şəhid kimdir, şəhid ailəsi nə çəkir?

Gəlməyin... Kimsə sizin saxta sevginizi, saxta qayğınızı istəmir! Sizlər şəhid evinə girəndə ayaqqabınızı soyunmağa tənəzzül etməyən adamlarsız. Sizdən gələn hər şey qəbulolunmazdır. Siz bizə nə verə bilərsiz axı? Sizin göz yaşlarınız da saxtadır, sevginiz də, üzüntünüz də...

Ey Dövlət Baba, səndən ricam, bizə dəstək olmaq üçün bizdən olanlardan, bizi anlayanlardan, bizim kimi içi yananlardan göndər. Dövlət adına şəhid evlərinə gələnlərin böyük əksəriyyəti hara gəldiklərini anlamırlar. "Şpilkadaban" ayaqqabıda bərli-bəzəkli xanımları, brend kostyumlu özündənrazı məmurları bizdən uzaq tut. Onlar ən yaxşı halda, saxta göz yaşı töküb, şəkil çəkdirmək üçün gəlirlər.

Bizlər atamızı, qardaşımızı, ərimizi, balamızı qurban verib "Vətən sağ olsun" deyə bilən adamlarıq. Onların saxta sevgisinə ehtiyacımız yoxdur. Ümumiyyətlə, bizim heç nəyə ehtiyacımız yoxdur. Bir ehtiyacımız var idi, o ehtiyacımız olanı da qurban vermişik, təki Vətənimiz bütöv, Dövlətimiz qüdrətli, Millətimiz başıdik olsun...

VƏTƏN SAĞ OLSUN!!!