Su motoru hekayəsi – Vüsal Hətəmov yazır

Su motoru hekayəsi və ya Azərsu ilə birgə keçmiş 10 il və növbəti 10 il

Su motorumuz xarab oldu. 10 (on) il işlətdik. Əla göstəricidir. Amma “maraqlı cəhəti” daha maraqlıdır. 2010-cu ildə bu su motorunu alanda soruşdum ki, neçə il işləyəcək. Satıcı dedi ki, 10 il işləyəcək... Yəni 2020-ci ilə qədər...

...Satıcı həmin rəqəmi deyəndə fikrə getmişdim. Motorun keyfiyyəti haqda deyil, növbəti 10 ili yaşayacağım və hər an yeni kəşflərin baş verdiyi dünyada, görəsən, 10 ildən sonra daha hansı kəşflərin olacağı fikri məni, müsbət mənada, çox təsirləndirmişdi: planetlərarası uçuş, müharibə silahlarının artıq muzeylərə təhvil verilməsi, insanların xəstəlik riskinin sıfıra enməsi və nəhayət, kommunal problemlərin heçə endirilməsi...

Bəli, düz 10 il keçdi. Artıq 2020-ci ildir. Yenisini almışam...

“Bu da 10 il işləyəcək” fikrini beynimdən keçirdiyim andaca yenə də “abırsızcasına” 2030-cu il haqda fantastik fikirlər beynimə gəldi: İnsanlar özləri süni şəkildə su, ağac, heyvan düzəldir, heç bir təbii resurs bitmir; digər planetlərdə Yer kürəsinin “kopyasını” yaratmışıq...

Lakin geriyə, bu “Yaşıldərə su problemi” ilə keçirdiyim 10 ilə boylanıb baxdıqda yenə də, növbəti on ildə də eyni şeyləri gördüm: “Sumqayıt Su İdarəsinin xəbəri olmadan” 460 manat verib su kollektoruna qoşulursan, sonra su idarəsi gəlib “prosedur qaydalarına uyğun olaraq” cərimə yazır və sayğac qoyur. Sonra isə su çəni alırsan. Ceyranbatan su anbarı ilə qəsəbənin arasındakı məsafə təxminən 500 metr olsa da, ailəlikcə günlərlə suyun gəlməsini güdürsən. Əgər su gələcəksə, suyu motorla çənə doldurursan, daha sonra motorla çəndən suyu evə vurursan, daha sonra.... Daha sonra sayğacda suyun bitir. Çünki su boruları günlərlə boş olduğu üçün içərisində “fiziki hadisə” baş verir, yəni içərisində hava yaranır və sən bu havanı su borusundan uzun müddətə motorla çıxarınca həm eneji itkisi, həm də su itkisi baş verir.

Beləliklə, kanalizasiya xidməti olmasa belə, 55 qəpikdən su kartının balansına pul yükləyirsən. Əlavə olaraq, işıq pulunu da artıqlaması ilə ödəyirsən. Axı bütün günü su motorunu elektirk enerjisi ilə işlədirsən! Sonra zəng edirsən, su idarəsinə. Və onlar səni elə gözəl şəkildə yola verirlər, ki onlara yazığın gəlir, evdə yeganə su mənbəyi olan tüpürcəyini udmaq əvəzinə onlara “hədiyyə” aparmaq istəyirsən.

Və sonra... Sonrası daha dəhşətdir... Bir-iki qohum-əqrəba, dost-tanış zəng edir ki, a bala, o su idarəsində filankəs yaxşı adamdır, onlarla işin olmasın..!

Vüsal Hətəmov