Ağlamayana pəpə vermirlər...

Ciddi devalvasiyaya, kəskin qiymət artımına, iki rəqəmli inflyasiyaya baxmayaraq əmək haqqı 1-2 ildən bir 10% artırılan ölkəmizdə müxtəlif xidmətlərin, eləcə də, qiyməti dövlət tərəfindən tənzimlənən malların qiymətləri 50-100% çivarında qaldırılır. Buna deyərlər "analoqu olmayan inkişaf edən ölkədə analoqu olmayan qiymət artımı"!!! 

Təbii, qiymətlərə vaxtaşırı yenidən baxmaq lazımdır. Qimətlərə yenidən baxılması təkcə onların artırılmasını nəzərdə tutmamalıdır. İqtisadiyyat inkişaf etdikcə, məhsul bolluğu yarandıqca qiymətlər aşağı salınmalıdır. Qiymətin bu və ya digər istiqamətlərdə dəyişdirilməsi kiminsə istəyi əsasında deyil, məhsul istehsalına, xidmətlərə sərf edilən xərclərə, yəni maya dəyərinə, əsaslanaraq həyata keçirilməlidir. 

Bakı metropolitenində gediş haqqı 50% qaldırılıb, 30 qəpik müəyyən edilib. Bakı metropoliteninin rəsmisi deyir ki, bu gün metroda bir nəfər üçün gediş xərci 47 qəpiyə bərabərdir! Kim bunu müəyyən edib? Metropoliten "mütəxəssislərimi"? Taarif Şurası bunu yoxlayıbmı? Təbii ki, yoxlamayıb, dəqiqləşdirməyib! "Bu onun işi deyil"!? Taarif Şurası qərarlarını ona təqdim edilən, "əsaslandırılmış təkliflər" əsasında qəbul edir. Bu zaman, təəsüf ki, yaşayışı gündən-günə çətinləşən insanları nəzərə almır. "Bu da onun işi deyi"l!!! İnsanların güzaranının yaxşılaşdırılması üçün tədbirlər görməli olanların isə buna "vaxtları yoxdur".İnsanlar isə unudurlar ki, "ağlamayana pəpə vermirlər"!