“Nə edim, gedib “türmə”də yatım?”–Masallıda seçki saxtakarlığı (VİDEO)

Xəbər verdiyimiz kimi, 23 dekabr 2014-cü il tarixində keçirilən Bələdiyyə seçkilərində 71 saylı Masallı Kənd Seçki Dairəsinin 1, 2, 3, 4, 5, 6, 37 və 38 saylı məntəqələrində qanun tozuntuları qeydə alınıb.

Asiya.az xəbər verir ki, bununla bağlı seçicilər dəfələrlə adiyatı qurumlara müraciət ediblər. Şikayətlərə əsasında 71 saylı Masallı Kənd Seçki Dairəsində 4 saylı məntəqənin seçki nəticələri ləğv edilib. Buna baxmayaraq, Ərkivan qəsəbəsində baş verən seçki saxtakarlıqlarını əks etdirən video görüntüləri Asiya.az-ın elektron ünvanına gəlməkdə davam edir. Növbəti video çəkilişlərdə seçkidən sonra 1 saylı seçki məntəqəsinin sədri Misriddin Cəbiyevin və 5 saylı seçki məntəqəsinin sədri Adəm Quliyevin seçki zamanı edilən saxtakarlıqları etiraf etməsindən bəhs edir.

Belə ki, 5 saylı seçki məntəqəsinin sədri Adəm Quliyev etiraf edir ki, seçkidə 277 nəfər iştirak edib. Amma 71 Saylı Masallı Kənd Seçki Dairəsi 5 saylı seçki məntəqəsində 346 nəfərin səs verdiyini qeyd edir. A.Quliyev daha sonra Ərkivan ərazi nümayəndəsi Sabiq Cahangirovun səhər saat 5-ə kimi seçki dairəsində olduğunu bildirir.
1 saylı seçki məntəqəsinin sədri Misriddin Cəbiyev isə məntəqədə səs verənlərin sayının 165 nəfər olduğun təsdiq edir. Lakin 71 saylı Masallı Kənd Seçki Dairəsində bu səs verənlərin sayı 405 nəfər göstərilib.

Daha sonra M.Cəbiyev Ərkivan bələdiyyə seçkilərində namizəd olub, “uduzan” Afər Cahangirova “Sabiqlə İcra başçısı nə desə mən onu etməliyəm. Nə edim, gedim “türmə”də yatım!?..Bizi ora qoyan Sabiqlə YAP-ın sədridir. YAP-ın üzvüyük. Mən özümü oda ata bilmərəm axı!?... Oğraşdı, yalan deyən, mən sənin səsini oğurlamamışam” deyib.