Hafiz Hacıyev: “Azərbaycana zərbə vurana, biz iki qat zərbə vuracayıq”

“Heç şübhəsiz ki, Leyla Yunusun arxasında dayanan yerli və xarici təşkilatların əsas istəyi Azərbaycan hökumətinə və hüquqi prosedurlara təzyiq göstərməkdir”. Bunu SİA-ya Müasir Müsavat Partiyasının (MMP) sədri Hafiz Hacıyev deyib.

Partiya sədrinin sözlərinə görə, bir erməninin Azərbaycanın daxilində təxribat yaratması, qarışıqlıq salması ölkəmizin beynəlxalq aləmdə nüfuzunun aşağı salınmasına hesablanmış addımdır: “Mən dəfələrlə demişəm ki, Leyla Yunus cinayətkardır. Bu insanları qızılın içində saxlasan da, onlar üçün hər bir şərait yaratsan da, yenə də pis şəraitdə olduqlarını deyəcəklər. Onlar çalışırlar ki, bütün dünyada gündəmdə qalmaqdan ötrü xaricilərin gözündə Azərbaycanı aşağılasınlar və başqa təsəvvür yaratsınlar. Təbii ki, bütün bunların hamısı bir oyundur. Bunların da başında müxalifət partiyasının arxasında gizlənən şəxslər dayanır. Heç şübhəsiz ki, bu oyunların hər biri istintaqa təzyiqdir və onu öz məqsədindən yayındırmaqdır. Düşünürəm ki, bunların hamısına soyuqqanlılıqla yanaşmaq lazımdır. Kimliyindən asılı olmayaraq, kimsə Azərbaycan dövlətçiliyinə zərbə vurarsa, biz onlara iki qat zərbə vuracayıq. Bu mənada hesab edirəm ki, heç bir narahatçılığa dəyməz”.