Avropa Parlamenti məruzəçilərinin son bəyanatı ədaləti əks etdirdi

Azərbaycanın işğal olunmuş ərazilərində Ermənistanın beynəlxalq hüquqa zidd bütün addımları pislənilməli və beynəlxalq qurumlar tərəfindən qınanılmalıdır. Bu baxımdan, Avropa Parlamentinin Cənubi Qafqaz ölkələri üzrə Parlament Əməkdaşlıq Komitəsinin həmsədri Marina Kalyurandın, Azərbaycan və Ermənistan üzrə daimi məruzəçilər Jelena Zavko, Trayan Beseskunun iyunun 11-də qəbul etdiyi bəyanat təqdirəlayiq addımdır, çox vacib sənəddir.
Bu fikirləri Azərbaycan Vətəndaş Hərəkatı (AVH) İdarə Heyətinin üzvü, araşdırmaçı-jurnalist Anar Turan bildirib.

Anar Turan

O deyibki, bəyanat Dağlıq Qarabağın və onun ətrafında olan ərazilərin Ermənistan tərəfindən qeyri-qanuni işğalını təsdiqləyir və Ermənistandan Dağlıq Qarabağa yeni yolun çəkilməsini regionda sülhə əngəl hesab edərək haqlı olaraq qınayır. Ermənistan tərəfindən Azərbaycan torpaqlarının işğalı və Nikol Paşinyan hakimiyyətinin əvvəlki sələflərinin yolu ilə gedərək status-kvonu saxlama cəhdləri Azərbaycan dövlətinin, cəmiyyətimizin hətta ən sülhə meyilli kəsiminin belə səbrini daşdırmaqdadır. Son aylar erməni tərəfinin işğal edilmiş Azərbaycan torpaqlarında təhrikedici hərəkətlərini artırması beynəlxalq qurumların da diqqətini cəlb etməkdədir. Ona görə də, Avropa Parlamentinin region üzrə məruzəçilərinin bəyanatı Ermənistan rəhbərliyinin məkrli planlarının ifşa edilməsi, prosesin nəzarətdə saxlanılması, düşmən dövlətə təzyiqin daha da artırılması sarıdan önəmli uğurdur.

AVH İdarə Heyətinin üzvü qeyd edib ki, əslində, bu bəyanatın təkcə Cənubi Qafqaz ölkələri üzrə Parlament Tərəfdaşlıq Komitələrində nümayəndə heyətinin həmsədri, həm də Azərbaycan üzrə məruzəçisi tərəfindən deyil, eyni zamanda Ermənistan üzrə məruzəçinin də adından verilməsi münaqişə ilə bağlı mötəbər Avropa qurumlarının vahid mövqeyi kimi də qiymətləndirilməlidir. Lakin ədalətin bərpası, Ermənistanın işğal, etnik təmizləmə siyasətinə son qoyması üçün beynəlxalq insan haqqları qurumlarının bu məsələdə mütəşəkkil prinsipial mövqe sərgiləməsi lazımdır. Çünki bu, Ermənistana təzyiq prosesinin ardıcıl xarakter alması baxımından zəruridir. Əks halda, Ermənistanın qeyri-konstruktiv davranışlarına davam etməsi sülhün bərqərar olması üçün Cənubi Qafqaz regionuna yaxşı heç nə vəd etmir.